Qazaqstanda salyqqa raqymshylyqty qansha bıznes sýbektileri paıdalandy
«Kásipkerlikti memlekettik qoldaý maqsatynda QR Tuńǵysh Prezıdenti salyq tóleýshiler negizgi qaryz somasyn tólegen jaǵdaıda eseptelgen ósimpuldar men aıyppuldardy shegerý jolymen shaǵyn jáne orta bıznes sýbektilerine salyqqa raqymshylyq júrgizý týraly tapsyrma berdi. Negizgi qaryz somasyn tólegen jaǵdaıda, salyq tóleýshilerge 2018 jylǵy 1 qazanǵa eseptelgen ósimpuldar men aıyppuldar somasy jáne de negizgi qaryzdy tólegen kúnge deıin eseptelgen ósimpul somasy esepten shyǵarylady. Salyq tóleýshi negizgi qaryz somasyn aǵymdaǵy jyldyń sońyna deıin tóleýge quqyly ekenine nazar aýdaramyz», - dedi Jaıdar Іńkárbaev Ortalyq kommýnıkatsııalar qyzmetindegi brıfıngte.
Aıta keteıik, raqymshylyqqa jer qoınaýyn paıdalanýshylar, aktsızdi taýarlardy óndirýshiler jáne de monıtorıngke jatatyn iri salyq tóleýshiler, ıaǵnı túsim normasy joǵary ekonomıka salalarynda qyzmet júrgizetin salyq tóleýshilerdiń jeke kategorııalary jatpaıdy.
«Qosymsha qabyldanǵan ózgertýlerge sáıkes, salyqqa raqymshylyqqa 2018 jylǵy 1 qazan kúngi jaǵdaıda bereshegi bolǵan salyq tóleýshiler, sondaı-aq atalǵan kúnge tekseris nátıjelerine shaǵym tapsyrǵan salyq tóleýshiler jatady. Sonymen qatar, salyqqa raqymshylyq 2018 jylǵy 1 qazanǵa deıingi merzimmen qosymsha salyq eseptilikteri tapsyrylǵan salyq tóleýshilerge jasalady. Búgingi kúni 41 820 bıznes sýbekti 12,5 mlrd teńgeni tólep, salyqqa raqymshylyqty paıdalandy. Olar boıynsha 4 mlrd teńge ósimpul, 291,2 mln teńge aıyppul esepten shyǵaryldy. Memlekettik qoldaýdyń jáne salyq tóleýshilerdiń bereshekterin óteý nátıjesinde salyq tóleýshilerdiń banktik shottary ashylyp, múlikke qoıylǵan shekteýler sheshildi. Bul óz kezeginde olarǵa kásipkerlik qyzmetin ary qaraı jalǵastyrýǵa múmkindik beredi», - dedi komıtet ókili.
