Qazaqstanda salyq tóleýshini onlaın tirkeý júıesi iske qosyldy

ASTANA. QazAqparat - Qazaqstanda salyq tóleýshini onlaın tirkeý júıesi iske qosyldy. Bul týraly búgin QR Qarjy mınıstrligi Memlekettik kirister komıteti Damý jáne jańǵyrtý departamentiniń dırektory Erjan Birjanov málim etti.

«2015 jyly salyq tóleýshilerdi, jeke kásipkerlerdi tirkeý úderisi jeńildetilgen bolatyn. Endi ol qyzmet onlaın rejimde de qoljetimdi», - dep atap ótti E. Birjanov.

Onyń aıtýynsha, Memlekettik kirister komıteti salyq tóleýshige keńes beretin onlaın kómekshini jasaqtady.
«Salyq tóleýshi tirkeýge turǵannan keıin, saıtqa kirip, ózine qajetti málimetterdi ala alady. Qandaı formany tapsyrý kerek, merzimder, esep tapsyrý ýaqyty syndy aqparattar usynylǵan», - dep atap ótti departament basshysy.

Onyń sózi boıynsha, bundaı shara fıskaldy organdardyń jazalaýshy sharalaryn azaıtý maqsatynda júzege asyrylyp otyr.
«Sebebi, salyq tóleýshiler esep tapsyrý kezinde kóp qatelik jiberedi. Sonymen qatar, salyq tóleýshi ortalyqtarda qyzmet alǵysy kelse, onda arnaıy moderatorlar bar. Moderator qandaı qyzmetti alý kerektigin, qandaı ótinishti toltyrý qajettigin aıtyp otyrady. Sondaı-aq, salyq jáne keden máseleleri boıynsha Call-ortalyq jumys jasaıdy. Call-ortalyqtyń biryńǵaı nómiri - 1414», - dep túıdi oıyn E.Birjanov.