Qazaqstanda salyq pen keden kodeksteri jeke-jeke daıyndalady
ASTANA. QazAqparat - Qazaqstanda salyq pen keden kodeksteri jeke-jeke daıyndalady. Bul týraly búgin Úkimettiń kezekten tys otyrysynda Premer-Mınıstr Baqytjan Saǵyntaev málim etti, dep habarlaıdy QazAqparat.
«Ulttyq ekonomıka mınıstrligi múddeli memlekettik organdarmen birlesip, jańa salyq kodeksin ázirleý barysynda ákimshileýdi túbegeıli jeńildetýi ári ony barynsha túsinikti jasaýy qajet. Bul jumystardyń aıasynda tıimsiz salyq jeńildikteri men preferentsııalarǵa revızıtsııa júrgizip, alyp tastaý kerek», - dedi Úkimet basshysy.
Onyń aıtýynsha, buǵan deıin biriktirilgen salyq jáne keden kodeksin ázirleý kózdelgen bolatyn.
«Biraq, Prezıdenttiń tapsyrmasyna sáıkes, Ulttyq ekonomıka men Qarjy mınıstrlikteri jeke-jeke salyq pen keden kodeksterin ázirleýi tıis», - dedi Saǵyntaev.
