Qazaqstanda salynyp jatqan úsh áýejaıdyń quny belgili boldy
ASTANA. KAZINFORM — Premer-mınıstrdiń birinshi orynbasary Nurlybek Nálibaev Úkimette ótken brıfıngte Qazaqstanda salynyp jatqan úsh jańa áýejaı qurylysynyń qunyn jarııalady.
Vıtse-premerdiń aıtýynsha, Memleket basshysynyń tikeleı tapsyrmasymen Shyǵys Qazaqstan oblysynyń Zaısan jáne Qatonqaraǵaı aýdandarynda jáne Mańǵystaý oblysynyń Kendirli aımaǵynda jańa áýejaılar salynyp jatyr.
— Bul áýejaılardyń qurylysy 2024 jyly bastaldy. Zaısandaǵy áýejaı qurylysyna shamamen 68 mlrd teńge, Kendirlidegi áýejaıǵa — 69 mlrd teńge, al Qatonqaraǵaıdaǵy áýejaıǵa — 89 mlrd teńge qarastyrylǵan, — dedi Nurlybek Nálibaev.
Vıtse-premer qurylys alańdaryna ózi baryp, jumys barysymen tanysqanyn atap ótti. Qazir nysandardyń qurylysy oblys ákimderi kúndelikti baqylap otyr.
— Jyl sońyna deıin Zaısan aýdanyndaǵy áýejaı qurylysyn tolyq aıaqtaımyz. Qatonqaraǵaıdaǵy áýejaıdy keler jyldyń aqpan aıynda halyq ıgiligine berýdi josparlap otyrmyz. Kendirlidegi áýejaı qurylysyn da bıyl jyl sońyna deıin aıaqtap, paıdalanýǵa beremiz, — deıdi spıker.
Sonymen birge Nálibaev qurylys jumystary bitken soń, qajetti qujattardy rásimdep, tıisti lıtsenzııalar alý kerektigin aıtty.
Osyǵan baılanysty jańa áýejaılar jolaýshylar men áýe kemelerine 2027 jyldyń birinshi jartyjyldyǵynda qyzmet kórsete bastaıdy.
Buǵan deıin Nurlybek Nálibaev bıyl qandaı joldar ashylatynyn aıtqan edi.
Sondaı-aq Almatydan Tokıoǵa tikeleı reıs ashylyp, Vena, Nıý-Iork jáne Mılan baǵyttary boıynsha áýe qatynasy jolǵa qoıylady.
