Qazaqstanda salyqtyq bereshekti ákimshilendirýge qatysty jańa ózgerister engizildi — Aryn Qaısar
ASTANA. KAZINFORM — QR Qarjy mınıstrligi Memlekettik kirister komıtetiniń Aýdıt departamenti bereshekpen jumys basqarmasynyń basshysy Aryn Qaısar salyq zańnamasyna engizilgen ózgerister týraly aıtyp berdi. Bul týraly ol tikeleı efır barysynda málimdedi.
Spıkerdiń aıtýynsha, jańa Salyq kodeksinde jeke jáne zańdy tulǵalarǵa qatysty oń ózgerister qarastyrylǵan.
— Qazirgi tańda esepshottar tipti 1 teńge nemese 200 teńge kólemindegi ósimpul úshin buǵattalyp, kásipkerler men azamattardyń qyzmetine kedergi keltirip jatyr. Keıbir adamnyń kúndelikti qajettilikterin — nan nemese qoǵamdyq kólikke tólem jasaý múmkindigi shektelip qalýda. Bul negizinen áleýmettik tólemder boıynsha bereshekke qatysty. Buǵan deıin áleýmettik tólemder boıynsha bir teńge bereshek úshin de esepshottar buǵattalatyn. Endi jańa Áleýmettik kodekske sáıkes, esepshottarǵa shekteý tek 6 aılyq eseptik kórsetkishten (AEK) joǵary bereshek bolǵan jaǵdaıda ǵana qoıylady. Bul degenimiz, eger áleýmettik tólemder boıynsha qaryz 6 AEK-ten (shamamen 23 000 teńgeden astam) assa ǵana esepshottar buǵattalady, — dedi Aryn Qaısar.
Taǵy bir mańyzdy jańalyq — salyq bereshegi bar tulǵalarǵa tólemdi bólip tóleý nemese keıinge qaldyrý rásimin jeńildetý.
— Qoldanystaǵy zańnama boıynsha, kez kelgen tólemdi keıinge qaldyrý nemese bólip tóleý rásimi mindetti túrde kepilmen qamtamasyz etilýi tıis bolatyn — ol boryshkerdiń nemese úshinshi tulǵanyń múlki, ne banktik kepil bolýy kerek. Endi jańa tártipke saı, eger bereshek 1 500 AEK-ten (shamamen 5,5 mln teńge) aspasa, salyq tóleýshi elektrondy túrde ótinish berip, eshqandaı qamtamasyz etýsiz tólem merzimin uzartýǵa múmkindik alady. Bul — tutynýshylyq nesıe tárizdi. Alaıda mundaı jaǵdaıda ósimpul esepteletin bolady, — dedi spıker.
Sondaı-aq zańnamaǵa sáıkes, bereshegi iri kólemdegi zańdy tulǵalardyń birinshi basshylaryna elden shyǵýǵa tyıym salynýy múmkin.
— Qoǵam tarapynan jıi suraqtar týyndaıdy — nege keıbir iri kásiporyndardyń basshylary salyq bereshegi bola tura shetelge shyǵyp ketedi? Bul suraqtar negizinen salyqtyq tekserýler nátıjesinde iri salyqtyq mindettemeler týyndaǵan isterge qatysty qoıylady. Endi, eger zańdy tulǵanyń nemese jeke kásipkerdiń bereshegi 27 000 AEK-ten (shamamen 106 mln teńge) asatyn bolsa, onda olardyń birinshi basshylarynyń elden shyǵýyna shekteý qoıylady, — dep atap ótti Aryn Qaısar.
Atalǵan jańashyldyq 2026 jylǵy 1 maýsymnan bastap kúshine enedi. Al basqa da ózgerister 2026 jylǵy 1 qańtardan bastap zańdy túrde qoldanylatyn bolady.
Salyq zańnamasyna engizilip jatqan taǵy bir jańashyldyq salyqtyq bereshekke saralanǵan dıfferentsıaldy tásildi qoldaný.
— Budan bylaı salyqtyq bereshekke qatysty sharalar qabyldaý shegi 20 aılyq eseptik kórsetkishke (AEK) deıin ulǵaıtylady. ıAǵnı, bereshek kólemine baılanysty úsh deńgeıli jikteý qarastyrylǵan: 20-dan 45 AEK-ke deıin, 45 AEK jáne odan joǵary. Bul rette árbir kúndik merzimin ótkizip alý boıynsha ósimpul esepteledi, — dedi spıker.
Onyń aıtýynsha, bereshek sheginen asqan jaǵdaıda ákimshilik sharalar qoldanylatyn bolady. Atap aıtqanda esepshottardy buǵattaý, qolma-qol aqsha operatsııalaryn toqtatý, kassalyq ornalasýdy engizý, debıtorlyq bereshekti óndirý — eger salyq tóleýshiniń úshinshi tulǵalardan alatyn qarajaty bolsa, múlikti satýǵa, aıyrbastaýǵa, syıǵa tartýǵa tyıym salý, aktsııalardy ıelikten shyǵarýǵa shekteý, tipti sot sheshimi arqyly kompanııany bankrot dep tanýǵa deıin sharalar qabyldanatyn bolady.
Eske sala keteıik, Qazaqstan Qarjy mınıstrligi Memlekettik kirister komıteti jeke tulǵalarǵa 2024 jylǵa arnalǵan múlik salyǵyn tóleýdiń sońǵy merzimi — osy jyldyń 1 qazany ekenin eskertedi.