Qazaqstanda salyq tóleýshiniń qaryzyn óteý úshin kepil múlki satylady — pılottyq joba

ASTANA. KAZINFORM — Endi salyq nemese basqa da tólem mindeti bar jeke tulǵanyń qaryzyn óteý úshin kepilge qoıylǵan múlikti satylymǵa shyǵarmaq. 

Qarjy mınıstrligi bıýdjetke tólenetin salyq pen basqa da mindetti tólem boıynsha bereshekti óteý maqsatynda salyq tóleýshi nemese úshinshi tulǵa kepilge qoıǵan múlikti satý rásimin jeńildetý úshin mobıldi qosymshany qoldanýǵa múmkindik beretin pılottyq jobany ázirledi.

Pılottyq joba aıasynda memlekettik kirister organdary salyq tóleýshiniń bereshegin óteý maqsatynda olardyń múlkin mobıldi qosymsha arqyly sata alady.

Qujatta pılottyq jobany iske asyrý erejesi men merzimi aıqyndalǵan. Pılottyq jobany 2025 jylǵy 31 jeltoqsanǵa deıin júzege asyrý josparlanyp otyr.

Qarjy mınıstrliginiń túsindirýinshe, atalǵan jańashyldyq májbúrlep óndirip alý sharasyn qoldaný merzimin qysqartyp, eńbek resýrsy shyǵynyn azaıtýǵa múmkindik beredi.

Joba «Ashyq NQA» portalynda bıyl 18 shildege deıin qoǵamdyq talqylaýǵa usynylyp otyr. 

Eske salaıyq, bıyl naýryzda elimizde salyq bereshegin óndirip alý tártibi qaıta qaralatyny týraly habarlaǵan edik.