Qazaqstanda salyq tólemeı jumys istep júrgen birneshe sheteldik platforma buǵattalýy múmkin

ASTANA. KAZINFORM – Memlekettik kirister komıteti tsıfrlyq aktıvterdi ákimshilendirý basqarmasynyń basshysy Talǵat Ádilov Qazaqstanda saýda jasaǵanymen salyq tólemeıtin sheteldik platformalar bar ekenin málim etti.

- Qazirdiń ózinde salyq tóleýden jaltaryp júrgen belgili bir salyq tóleýshilerdiń pýly bar. Olarmen jumys júrgizip jatyrmyz. Eskertpelerimizdi oryndaýdan jaltaryp júrgen salyq tóleýshilerge qatań sharalar qoldanamyz, - dedi Talǵat Ádilov.

Aıtýynsha, jańa Salyq kodeksi komıtetke osyndaı ókilet berip otyr.

- 2026 jyldyń 1 qańtarynan bastap Qazaqstanda tártip boıynsha tirkelmegen jáne salyq tólemeı júrgen sheteldik platformalardy buǵattaıtyn norma kúshine enedi. Áýeli eskertpe jiberemiz. Ol eskertpeniń talaptaryn oryndamasa, Qazaqstanda jumys istemeıtindeı etip buǵattaımyz. Qazir bankter sheteldik ınternet platformalardyń aqsha operatsııalary týraly málimetterdi jyl saıyn berip otyrady. Biraq olardyń salyq eseptilik kezeńi toqsan saıyn bolǵandyqtan jańa buıryq boıynsha bankter de toqsan saıyn aqparat beretin bolady, - dedi ol.

Talǵat Ádilov Qazaqstan bıýdjetine eń kóp salyq tólegen sheteldik platformalardy da atady.