Qazaqstanda «Salaýatty qala» jobasy ázirlendi
ASTANA. QazAqparat - Elimizde «Salaýatty qala» jobasy ázirlendi. Bul týraly OKQ-de ótken baspasóz máslıhatynda aıtyldy, dep habarlaıdy QazAqparat tilshisi.
QR Densaýlyq saqtaý mınıstrligi Qoǵamdyq densaýlyq saqtaý ulttyq ortalyǵy Dúnıejúzilik densaýlyq saqtaý uıymynyń qoldaýymen qoǵamdyq densaýlyq saqtaýdyń 10 negizgi jedel qyzmetine baǵalaý júrgizdi. Ol qadaǵalaý, normatıvti retteý, baǵalaý, saýyqtyrý, aýrýǵa qarsy kúresý isinde maman daıarlaý sııaqty sharalardy qamtıdy.
«Bizdiń basty maqsatymyz - ómir súrý uzaqtyǵyna áser etý. Biz ozyq tájirıbeler men daǵdylardy nazarǵa ala otyryp, tamaqtaný mádenıetin ózgertýge qatysty usynystardyń ǵylymı negizdemesin qalyptastyryp, adam ómiri men is-áreketiniń, aýrýdyń aldyn alý sharalary men densaýlyqty nyǵaıtý baǵyttarynda jumystar jasaýdamyz», - dedi QR DSM Qoǵamdyq densaýlyq saqtaý ulttyq ortalyǵy dırektorynyń orynbasary Jámılá Battaqova.
Ol sondaı-aq, aımaqtardaǵy túrli qyzmetterdiń (polıtsııa, ekologııalyq baqylaý, kommýnaldyq qyzmet) is-qımylyn retteý úshin «Salaýatty qala» (aımaq) jobasynyń ázirlengenin aıtty.
Bul ómir súrýdiń qaýipsizdik jaǵdaılarymen, medıtsınalyq qyzmetterdiń qoljetimdiligimen, dene belsendiligi men sportpen aınalysý úshin jaǵdaı jasaý, aýa men sýdy lastaýdy azaıtý sharalarymen qamtamasyz etedi.
Odan bólek, ár aımaqta salaýatty ómir saltyn nasıhattaıtyn mektep, JOO, aýrýhanalardyń kómegimen adam densaýlyǵy úshin jaǵdaı jasaý jáne onyń jolyndaǵy kedergiler men ózekti máselelerdi anyqtaýdyń mańyzdy ekeni aıtyldy.
«Ulttyq jeli qurý maqsatynda «Qazaqstannyń salaýatty qalalary» brendin tanytyp, ony júzege asyrý joldaryn ashqymyz keledi. Nátıjesinde kólikterdi azaıtý esebinen jaıaý júrginshi jolyn, velojoldardy kóbeıtý qorshaǵan ortanyń lastanýyn báseńdetedi. Demek, bul tynys joldary, allergııa, demikpe aýrýlarynyń qaýpin seıiledi», -dedi J.Battaqova.
