Qazaqstanda salaýatty ómir saltyna betburys kúsheıip keledi
ASTANA. KAZINFORM — 7 sáýirde Qazaqstanda Dúnıejúzilik densaýlyq kúni atap ótiledi. Bul kún erte shaqtan salaýatty ádetterdi qalyptastyrýdyń, aýrýlar profılaktıkasynyń jáne belsendi ómir saltynyń mańyzdylyǵyna arnalǵan. Bul týraly vedomstvonyń baspasóz qyzmeti málim etti.
Ulttyq zertteýlerdiń derekterine sáıkes kún saıyn keminde 400 gramm jemis pen kókónis tutynatyn azamattardyń úlesi 2015 jylǵy 34,3%-dan 2024 jyly 41,7%-ǵa deıin artqan.
Densaýlyq saqtaý mınıstrliginiń málimetinshe, bul halyqtyń arasynda durys tamaqtaný daǵdylarynyń birtindep qalyptasyp, tamaqtaný máselelerindegi sanaly kózqarastyń artqanyn kórsetedi.
Alkogoldi qaýipti mólsherde tutyný deńgeıiniń aıtarlyqtaı tómendeýi baıqalady. Eger 2015 jyly bul kórsetkish 4,1% bolsa, 2024 jyly 1,6%-ǵa deıin azaıǵan.
Sonymen qatar halyqtyń dene belsendiligi de artyp keledi. Aptasyna keminde 150 mınýt ortasha nemese joǵary deńgeıdegi dene belsendiligimen aınalysatyn eresekterdiń úlesi 2021 jylǵy 18,8%-dan 2024 jyly 30,4%-ǵa deıin ósti.
Halyq densaýlyǵyn nyǵaıtý jáne qaýip faktorlaryn tómendetý maqsatynda 2025 jylǵy 1 qańtardan bastap Qazaqstanda energetıkalyq sýsyndardy satýǵa jas shekteýleri engizildi — olardy 21 jasqa tolmaǵan tulǵalarǵa satýǵa tyıym salynǵan.
Sondaı-aq, satý qaǵıdalaryn buzǵany úshin ákimshilik jaýapkershilik qarastyrylǵan.
Qosymsha túrde energetıkalyq sýsyndarǵa qatysty aktsızdik saıasat engizilmek. Aktsız mólsherlemeleri kezeń-kezeńimen 2030 jylǵa qaraı 240 teńgege deıin ulǵaıtylady.
Bul sharalar, ásirese jastardyń arasynda, densaýlyqqa zııan keltiretin ónimderdi tutynýdy azaıtýǵa baǵyttalǵan.
— Qazaqstan Dúnıejúzilik densaýlyq saqtaý uıymynyń semizdikpen kúresti jedeldetý jónindegi jahandyq josparyna qosyldy. Buldurys tamaqtanýdy ilgeriletý jáne ınfektsııalyq emes aýrýlardyń profılaktıkasy boıynsha sektoraralyq sharalardy kúsheıtýge múmkindik beredi, — delingen habarlamada.
Densaýlyq saqtaý mınıstrligi densaýlyq mádenıetin qalyptastyrý, qaýip faktorlaryn tómendetý jáne halyqtyń ómir sapasyn arttyrý baǵytyndaǵy júıeli jumysty jalǵastyrady.
Aıta keteıik, buǵan deıin densaýlyqqa qaýipti jaǵdaılardy kórsetetin karta iske qosylǵan edi.
