Qazaqstanda salalyq JI modelder qurylady

ASTANA. KAZINFORM — Jasandy ıntellektti tabysty engizý úshin sapaly salalyq derekter qajet. Bul týraly Premer-mınıstrdiń orynbasary — Jasandy ıntellekt jáne tsıfrlyq damý mınıstri Jaslan Mádıev aıtyp berdi.

Sapaly derekter — jasandy ıntellekt úshin negizgi resýrs jáne birqatar memlekettik organ derekterdi tsıfrlandyrýdyń qolaıly deńgeıine jetti. Bul jasandy ıntellektti qoldanyp, túrli tsıfrlyq sheshimderdi jasaýǵa múmkindik berdi.

— Endigi kezeńde biz salalyq JI modelderdi qurýǵa kiristik. Osyndaı modelder negizinde jasalǵan jasandy ıntellekt ónimderi jyldamyraq, dálirek jumys isteıdi jáne olardy óndiris oryndarynda jergilikti deńgeıde paıdalanýǵa bolady, — dedi J. Mádıev Úkimettiń keńeıtilgen otyrysynda.

Sonymen qatar, ekonomıkanyń naqty sektorynda jasandy ıntellektti engizý úshin derekterdi tsıfrlandyrý deńgeıi jetkiliksiz ekeni baıqalady.

— Qazirgi ýaqytta salalyq derekterdiń ortasha tsıfrlyq daıyndyq deńgeıi 57 paıyzdy quraıdy. Jasandy ıntellektti tabysty engizý úshin tsıfrlandyrý deńgeıi 90 paıyzdan joǵary bolýy qajet. Sondyqtan bıyl salalyq memlekettik organdarmen jáne bıznes-qoǵamdastyqpen birlesip osy baǵytta jumys júrgiziledi. Onyń ishinde memlekettik qoldaý sharalarynyń ornyna óndiristerdi tsıfrlandyrý boıynsha ózara mindettemeler tetigin engizýge basymdyq beriledi, — dedi sala mınıstri.

Budan buryn Mádıev barlyq vedomstvolyq júıe QazTech biryńǵaı platformasyna kóshiriletinin aıtty.