Qazaqstanda salafızm aǵynyn ustanǵandardyń sany 15 myńǵa jýyqtaıdy - Ǵ.Shoıkın
ASTANA. QazAqparat - Qazaqstanda salafızm baǵytyna ketken adamdardyń naqty sanyn shyǵarý múmkin emes. Biraq, shamamen olardyń sany 15 myńǵa jetedi. Búgin «Ekspert» klýbynyń otyrysyna qatysqan QR Mádenıet jáne sport mınıstrligi Din isteri komıtetiniń tóraǵasy Ǵalym Shoıkın osylaı málim etti.
«Salafızm baǵytyna ketken adamdardyń naqty sanyn shyǵarý múmkin emes. Biraq, shamamen olardyń sany 15 myńǵa jetedi. Qazaqstanda qansha adam osy salafızm baǵytyna ketkenin eshkim de dóp basyp aıta almaıdy. Qazir qoǵamda sarapshylar osy aǵymǵa tyıym salý týraly pikir aıtyp jatyr. Quzyrly organdar bul máseleni jan jaqty zertteýde. Biraq, osy baǵytqa kádimgideı tyıym salsaq, onyń saldary qandaı bolady degen máseleni qaraý kerek. Qazir bul máseleni jan-jaqty qaraý kerek ekenin, sebebi, eger biz radıkaldy sharalar qabyldasaq, onda ádebıetti, aýdıo-beınejazbalarǵa qatysty sheshim qabyldaýymyz kerek. ıaǵnı, bir tyıym salýmen sheshiletin másele emes. 2014 jyldan beri «Aqnıet» ońtaılandyrý ortalyǵy dástúrli emes dinı aǵymǵa ketken 300 adamdy durys jolǵa salǵan. Biraq, olardyń qaıtyp sol aǵymǵa barmaıtynyna eshkim kepil bere almaıdy. Qazir teris aǵymǵa ketken 500-den astam adam jazasyn ótep jatyr»,-dep habarlady Ǵalym Shoıkın.
Al, QMDB tóraǵasynyń orynbasary, naıb múftı Serikbaı qajy Oraz Alla Elshisi Muhammed Paıǵambardyń (s.a.ý.) myna bir ósıetin aıtyp berdi.
«Muhammed Paıǵambarymyz: «men ómirden ótkennen keıin sender 73 túrli aǵymǵa bólinesińder» degen eken. «Sonyń jetpis ekisi adasyp júredi de, bir ǵana jol túzý jolmen barady» depti. Sona Alla Elshisinen «olar kimder» dep surapty. Sonda Paıǵambarymyz: «Meniń súnnetimdi tolyq ustanǵandar, men aıtyp ketken joldy ustanyp, keıingi urpaqqa jetkizetinder jáne sonyń jolyna ergender» degen eken. Jalpy, búgingi tańda, salystyrmaly túrde qarasaq, ol 73 emes, 73 jolynyń ishinen de qanshama bólinip shyqqan júzdegen aǵymdar bolýy múmkin»,-dedi bul máseleni tolyqtyrǵan S.Oraz.
