Qazaqstanda rýli oń jaqta ornalasqan kólikterge nelikten tyıym salynǵan – ІІM jaýaby
NUR-SULTAN. QazAqparat – QR ІІM Ákimshilik polıtsııa komıteti tóraǵasynyń orynbasary Serik Túsipov Qazaqstanda rýli oń jaqta ornalasqan kólikterge nelikten tyıym salynǵanyn túsindirip berdi, dep habarlaıdy QazAqparat tilshisi.
«Armenııadan ákelingen kólikti tirkeý quny - 11 940 teńge. Oǵan tirkeý jınaǵy úshin qosylatyn 695 teńge, tehnıkalyq qujat úshin 3473 teńge, memlekettik nómir úshin 7778 teńge tóleý kerek. Ákelingen kólikter Armenııanyń jaýapty organdarynyń esebinde turǵandyqtan olardy Qazaqstanǵa tirkeý kezinde olarǵa sary tústi memlekettik tirkeý nómiri beriledi. Mundaı nómirler – basqa memlekette turaqty tirkeýi bar kólikterge beriledi. Sonymen qatar kólik ıesiniń turyp jatqan oblystyń kodymen tapsyrylady», - dedi ol OKQ-da «QR azamattary Armenııadan ákelgen avtomobılderdi tirkeý týraly» taqyrybynda ótken baspasóz máslıhatynda.
ІІM ókiliniń aıtýynsha, rýli oń jaqtaǵy kólikter tirkelmeıdi. Sebebi mundaı sanattaǵy kólikterge qatysty shekteý Qazaqstanda 2009 jyldan beri bar.
«Rýli oń jaqta ornalasqan kólikterge tyıym – jol júrý erejesi zańymen jáne kedendik odaqtyń tehnıkalyq reglamentimen retteledi. Bul tyıym Armenııamen birge ózge memleketterden keletin kólikterge qatysty. Rýli oń jaqtaǵy kólikter áý basta jol erekshelikterine baılanysty Japonııa, Ulybrıtanııa elderinde ruqsat etilgen. Mundaı kóliktermen bizdiń elde júrý yńǵaısyzdyq týyndatady. Máselen, ondaı kólikter aldyndaǵy kólikten ozǵysy keletin jaǵdaıda júrgizýshi qarsy kele jatqan kólikterdi baıqamaı qalýy múmkin», - dedi ol.
