Qazaqstanda ruqsaty bar 14 myńnan astam sheteldik jumys isteıdi

NUR-SULTAN. QazAqparat - 1 sáýirdegi jaǵdaı boıynsha 14 794 sheteldik azamat jergilikti atqarýshy organdardyń ruqsatymen Qazaqstan Respýblıkasynyń aýmaǵynda eńbek etip júr, dep habarlaıdy QazAqparat Eńbek jáne halyqty áleýmettik qorǵaý mınıstrligine silteme jasap.

Sheteldik jumys kúshin tartýǵa berilgen ruqsattardyń ishinde mynadaı sanattar bar: birinshi sanat – 648 (basshylar jáne olardyń orynbasarlary), ekinshi sanat – 3 240 (qurylymdyq bólimshelerdiń basshylary). Sheteldik jumys kúshiniń negizgi bóligi úshinshi (mamandar) jáne tórtinshi (bilikti jumysshylar) sanattarǵa jatady – tıisinshe 7 397 adam jáne 491 adam. Sondaı-aq maýsymdyq jumystarǵa – 1 329 adam, al korporatıvtik aýystyrý sheńberinde – 1 689 adam tartylǵan.

Qazirgi ýaqytta Qazaqstanda sheteldik jumys kúshin paıdalanatyn 1 641 jumys berýshi bar. Olarda shamamen 489 myń Qazaqstan azamaty jumys isteıdi, bul jalpy jumysshy sanynyń 97%-y.

Eńbekshi mıgranttar shyǵatyn negizgi elder kelesi: Qytaı – 3 617 adam, Túrkııa – 1 490 adam, Úndistan – 1 098 adam, Ulybrıtanııa – 947 adam, Ózbekstan – 1 369 adam.

Esterińizge sala keteıik, ishki eńbek naryǵyn qorǵaý maqsatynda QR Eńbek jáne halyqty áleýmettik qorǵaý mınıstrligi jyl saıyn elimizge sheteldik mamandardy tartýǵa arnalǵan kvota belgileıdi. 2021 jyly kvota mólsheri jumys kúshine shaqqanda 0,31%-dy nemese 29,3 myń birlik.