Qazaqstanda ruqsat berý qujattary elý paıyzǵa deıin qysqartylady
ASTANA. QazAqparat - Búgin Senattyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine ruqsat berý qujattaryn qysqartý jáne ruqsat berý rásimderin ońaılatý máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady.
Zań jobasy Memleket basshysynyń ruqsat berý qujattaryn elý paıyzǵa deıin qysqartý týraly tapsyrmasyn júzege asyrýǵa baǵyttalady.
Bul rette qujattyń maqsaty Qazaqstanda kásipkerlikti damytý úshin qolaıly jaǵdaılar jasaý, bızneske ákimshilik qysymdy azaıtý jáne jeke kásipkerlikti memlekettik retteý tıimdiligin arttyrý bolyp tabylady. Soǵan sáıkes, zań jobasymen jeti kodeks pen otyz zańǵa qaıtalanatyn jáne basy artyq ruqsat berý qujattaryn joıýǵa, ruqsattardy habardar etý tártibine aýystyrýǵa jáne ruqsat berý rásimderin ońaılatýǵa baǵyttalǵan ózgerister men tolyqtyrýlar engiziledi.
Bul rette ekinshi sanattaǵy birqatar ruqsat túrleriniń kúshi joıylady. Atap aıtqanda, zańnamadan retteýshi memlekettik organdar quzyretinen ruqsat berý qujattaryn berý jónindegi fýnktsııalardy alyp tastaý arqyly 39 ruqsattyń kúshi joıylady. 18 ruqsatty habarlama jasaý tártibine aýystyrý qarastyrylady. Bul rette kásipkerge qyzmetti bastaǵanǵa deıin retteýshi memlekettik organǵa qajetti aqparatty kórsete otyryp, habarlama jiberse jetkilikti bolady. Al 95 ruqsat berý rásimderi ońtaılandyrylady. Osyǵan baılanysty «bir tereze» qaǵıdaty boıynsha, ıaǵnı kásipkerge ruqsat bergen kezde kásipkerdiń qujattar jınaý men daıyndaýǵa barynsha az qatysýyn, onyń memlektetik organdarmen tikeleı baılanystaryn shekteýdi kózdeıtin ruqsat qujattaryn ortalyqtandyrylǵan túrde berý qamtylady.
Adam densaýlyǵy men ómirine, ekologııaǵa, ulttyq qaýipsizdikke, sonymen birge, halyqaralyq kelisimderdiń buzylýyna qaýip tónýine jol bermeý maqsatynda asa qaýipti qyzmet túrlerin júzege asyratyn 52 ruqsat qysqartýǵa jatpaıdy. Budan basqa, Qazaqstannyń halyqaralyq mindettemeleri sheńberinde reglamentteletin 41 ruqsat berý qujaty da qysqartylmaıdy. Tutastaı alǵanda, ruqsat berý qujattaryn qysqartý memlekettik kiristerdiń qysqarýyna da soqtyrady. Máselen, qysqartýǵa jatatyn on bir ruqsat qujatyn berý aqyly negizde kórsetilgen bolatyn.
Tutastaı alǵanda, zań jobasyn qabyldaý bızneske degen qysymdy azaıtýǵa, ákimshilik tosqaýyldar sanyn qysqartýǵa, memlekettik organdardy artyq fýnktsııalardan aryltýǵa, sonymen birge, kásipkerlikti damytý úshin barynsha qolaıly jaǵdaılar jasaýǵa múmkindik beredi.
