Qazaqstanda robototehnıka salasynda zertteýler júrgizilýde
ASTANA. 15 maýsym. QazAqparat - Nazarbaev Ýnıversıtetinde robototehnıka salasynda zertteýler júrgizilýde jáne bul zertteýler keleshekte elimizdiń ındýstrııalyq salasynda qoldanylýy múmkin.
Nazarbaev Ýnıversıtetinde «Aınalmaly platforma -alystan ólsheýshi lazerlik quraly» júıesi úshin sensor ólshemderin qatar qoldaný algorıtmderi zerttelýde. Zertteýshiler nysanaǵa deıingi aralyqty ólsheı alatyn LIDAR -optıkalyq sensor tehnologııasyn lazer pýlsterin qoldana otyryp paıdalanýdy usynýda.
«Qazir biz aınalmaly platformanyń shaǵyn úlgisin jasaýmen aınalysyp jatyrmyz. Eki elektr qozǵaltqyshynan turatyn platforma eki birdeı keńistikte ártúrli baǵytta aınala alady... Biz ol platformaǵa sensor -alystan jobalaıtyn lazerlik qural ornatpaqpyz, robototehnıkada bul jańa tehnologııa mobıldi robottardy bir jerge jumyldyrý úshin, robottar avtomattyq rejimde qorshaǵan keńistiktiń kartasyn jasaýlary úshin, navıgatsııa joldary men mobıldik robottardyń kedergilerdi aınalyp ótý joldaryn josparlaý úshin qoldanylady»,- dedi Nazarbaev Ýnıversıteti Ǵylym jáne tehnologııalar mektebiniń professor Almas Shyntemirov rm.kz saıtyna bergen suhbatynda.
Jobada qorshaǵan ortanyń 3D-úlgisin jasaý úshin HokuyoUBG-04lH-F01 lazerlik ólsheý quraly qoldanylady. 3D formattaǵy málimetterdi alý úshin LIDAR sensory qarapaıym aınalmaly platformaǵa ornatylatyn bolady.
Oǵan qosa, dońǵalaqty jáne mobıldik bazalarǵa ornatylǵan gıbrıdtik robototehnıkalyq platforma jasaý jobasy da josparlanyp otyr. Bul jobany Bilim jáne ǵylym mınıstrligi byltyr qoldaǵan bolatyn. Jobamen Nazarbaev Ýnıversıteti Ǵylym jáne tehnologııalar mektebiniń professorlary Almas Shyntemirov pen Atakan Varol aınalysýda.
Bul jobanyń ǵylymı jetistikteri qaýipti jaǵdaılarda qubyrlar jelisin dıagnostıkalaýda, jarylǵysh zattardy joıýda, tótenshe jaǵdaılar kezindegi jumystarda keńinen jáne nátıjeli qoldanyla alady. «Bul joba jetekshi ulttyq kompanııalarmen yntymaqtastyq ornatý, Qorǵanys mınıstrliginiń, ónerkásip salalarynyń mindetteri úshin atalmysh tehnologııalardy keńinen qoldaný maqsatynda jasalýda»,- deıdi joba avtorlarynyń biri A.Shyntemirov.
Robototehnıka salasynda qol jetkizip otyrǵan teorııalyq jáne tájirıbelik bilim qory elimizdiń ındýstrııalyq salasyndaǵy úlken jobalardy iske asyrýda keńinen qoldanylatyny anyq.
