Qazaqstanda rıteılge qaraǵanda kóterme saýdagerlerdiń jalaqysy joǵary
NUR-SULTAN. QazAqparat – Resmı derekterge sáıkes, Qazaqstanda kóterme saýda, rıteıl men avtojóndeý salasyndaǵy ortasha aılyq eńbekaqy osy jyldyń birinshi toqsany boıynsha 184,9 myń teńge boldy. Bul – bir jyl burynǵy kórsetkishke qaraǵanda 10 paıyzǵa artyq. Alaıda ınflıatsııany esepke alǵandaǵy shynaıy ósim 3,8 paıyzdy quraǵan. Bul týraly QazAqparat ranking.kz saıtyna silteme jasap habarlaıdy.
Salystyrý úshin myna derekterge kóz júgirtsek: Qazaqstanda bir jyldyń ishinde aılyq eńbekaqy mólsheri 18,9 paıyzǵa ósip, 200,3 myń teńgeni qurady. Satyp alý qabiletiniń shynaıy ósimi 12,2 paıyzǵa jetti.
Avtokólik pen mototsıkl saýdasy salasyndaǵy aılyq ortasha eseppen 232,4 myń teńgeni (satyp alý qabiletiniń 3,8 paıyzǵa tómendeýin eseptegende +2 paıyz), kóterme saýda salasynda 224,4 myń teńgeni (satyp alý qabiletiniń 4,2 paıyzǵa artýyn eseptegende +12,6 paıyz), rıteılde 149,7 myń teńgeni (shynaıy ósimniń 9,9 paıyzǵa artýymen +16,5 paıyz) kórsetti.
Óńirler boıynsha eń joǵary aılyqty Almatydaǵy saýda salasynyń qyzmetkerleri alatyny (238,5 myń teńge – bir jyl burynǵy kórsetkishten 10,4 paıyzǵa artyq) anyqtaldy.
Úzdik úshtikke sonymen qatar elorda (208,6 myń teńge - bir jyl burynǵy kórsetkishten 5,4 paıyzǵa artyq) men Atyraý oblysy (173,8 myń teńge - bir jyl burynǵy kórsetkishten 5 paıyzǵa artyq) ilindi.
Saýda salasy - COVID-19 pandemııasy men Qazaqstanda 16 naýryz ben 11 mamyr aralyǵynda kúshinde bolǵan tótenshe jaǵdaı saldarynan qatty zardap shekken salalardyń biri. Bólshektik saýda karantın ýaqytynda eki ese tómendegen. Aımaqtardyń bárinde bul salada eńbek etetinderdiń bári shyǵynǵa ushyrady.
Qazaqstanda saýda, avtokólik pen mototsıkl saýdasy salasynda 1,44 mln adam jumys isteıdi (bir jyl burynǵy kórsetkishten 2,6 paıyzǵa artyq). Bul – Qazaqstanda jumys isteıtinderdiń 16,3 paıyzy.
