Qazaqstanda rezonans týdyrǵan tutynýshylyq isterdiń esebi júrgiziledi
ASTANA. KAZINFORM — Qazaqstanda tutynýshylardyń quqyǵyna qatysty iri daýlar arnaıy esepke alynyp jatyr. Bul týraly OKQ alańynda QR Saýda jáne ıntegratsııa mınıstrligi Tutynýshylardyń quqyqtaryn qorǵaý komıtetiniń tóraǵasy Bolat Tanabergenov aıtty.
Onyń sózinshe, mundaı ister azamattardyń quqyqtyq saýatyn arttyrý jáne tutynýshylardyń quqyǵyn tıimdi qorǵaý úshin baqylaýǵa alynǵan.
Rezonanstyq ister úsh negizgi ólshem boıynsha anyqtalady. Atap aıtqanda, tutynýshyǵa keltirilgen shyǵyn kólemi 5 mln teńgeden assa, bir másele boıynsha bes jáne odan kóp adamnyń quqyǵy qorǵalsa nemese azamattardyń quqyǵy jappaı buzylǵan jaǵdaıda sotqa talap aryz berilse, is arnaıy esepke engiziledi.
— Bıylǵy alǵashqy úsh aıda tutynýshylarǵa 5 mln teńgeden astam qarjy qaıtarylǵan ister boıynsha 18 adamnyń quqyǵy qorǵaldy. Qaıtarylǵan qarajattyń jalpy kólemi 190 mln teńgeni qurady, — dedi Bolat Tanabergenov.
Sonymen qatar bir másele boıynsha birneshe adamnyń quqyǵy buzylǵan 6 is qaralǵan. Sonyń nátıjesinde 31 tutynýshynyń máselesi sheshilip, olarǵa 4,2 mln teńge ótelgen.
Budan bólek, onnan astam adamnyń quqyǵy buzylǵan jaǵdaıda sotqa tutynýshylardyń belgisiz tobynyń atynan talap qoıý tájirıbesi de qoldanylyp jatyr.
— Osy baǵytta 3 is qaraldy. Nátıjesinde 44 tutynýshynyń quqyǵy qorǵalyp, 1,8 mln teńge óndirilip berildi, — dedi komıtet tóraǵasy.
Aıta keteıik, buǵan deıin Almaty oblysynda tutynýshylarǵa 44 mln teńge qaıtarylǵanyn jazǵan edik.
