Qazaqstanda restavratorlar mektebin ashatyn kez keldi - R. Bektóreeva
ALMATY. QazAqparat - Qazaqstanda restavratorlar mektebin ashatyn kez keldi. Bul týraly búgin Almatyda Halyqaralyq mýzeıler kúnine arnalǵan «Mýzeıler jáne mádenı landshafttar» atty keń aýqymdy shara barysynda «QazAqparat» HAA tilshisine bergen jaýabynda «Ǵylym ordasy» RMK Arheologııa mýzeıiniń meńgerýshisi Roza Bektóreeva málim etti.
Onyń aıtýynsha, Qazaqstanda qazirgi tańda restavratorlar jetispeıdi.
«Qazaqstanda bilikti restavratorlar mektebin ashatyn kez keldi. Olar qazir mýzeılerdiń barlyǵyna kerek-aq. Arheologııa, Tabıǵat, Geologııa, Sırek kitaptar jáne basqa da murajaılar bolsyn, barlyǵy restavratorlarǵa muqtaj. Árıne, elimizde restavratorlar barshylyq, biraq olar kóp jaǵdaıda bul ónerdi ózdiginen meńgergen arheologtar bolyp keledi. Olardyń ózi jetispeıdi. Biz mysaly, keıde qandaı da bir buıymdy qalpyna keltirý úshin qaladaǵy keramıka zaýytynyń mamandaryna júginýge májbúr bolamyz. Sondyqtan, Qazaqstanǵa restavratorlar mektebi aýadaı qajet bolyp tur», - dedi R. Bektóreeva.
Aıta ketelik, Esik qorǵanynan tabylǵan ataqty «Altyn adamdy» qalpyna keltirgen ataqty arheolog-restavrator Vladımır Sadomskov mamandyǵy boıynsha tarıhshy bolatyn. Ol kezinde Qazaq ulttyq ýnıversıtetiniń tarıh fakýltetin bitirgen edi.
