Qazaqstanda respýblıkalyq mańyzdaǵy joldardy jóndeý jumystary bastaldy
ASTANA. QazAqparat - Qazaqstanda respýblıkalyq mańyzdaǵy joldardaǵy oıyq-shuńqyrlardy jóndeý jumystary bastaldy, dep habarlady «Qazaqavtojol» RMK baspasóz qyzmetinen.
«Búginde shamamen barlyq oblystarda joldardaǵy shuńqyrlardy jóndeý jumystary bastaldy. Joldaǵy jóndeý jumystaryna Aqmola, Aqtóbe, Almaty, Atyraý, Shyǵys Qazaqstan, Jambyl, Batys Qazaqstan, Qaraǵandy, Qyzylorda, Qostanaı, Mańǵystaý, Pavlodar, Soltústik Qazaqstan jáne Ońtústik Qazaqstan oblystary kirisip ketti», - delingen habarlamada.
Baspasóz qyzmetiniń málimetinshe, «Qazaqavtojol» RMK 755016 sharshy metr joldy jóndeýdi josparlaǵan. Búginde onyń 151887 sharshymetri jol jóndeldi. Barlyq oblystar boıynsha mundaı jumystarǵa tartylǵan tehnıka sany 300 birlikti qurady.
«Qazaqavtojol» RMK fılıaldary da jol boıynda belgi salýda.
Respýblıkalyq mańyzdaǵy joldardyń jalpy uzyndyǵy 23657 shaqyrymdy quraıdy.
