Qazaqstanda Reseımen birlesken kooperatsııa baǵdarlamasy aıasynda birqatar joba júzege asyrylady
NUR-ASTANA. QazAqparat - QR Prezıdenti Qasym-Jomart Toqaevtyń Reseıge resmı sapary barysynda taraptar birqatar mańyzdy qujatqa qol qoıdy, dep habarlaıdy QazAqparat tilshisi.
Atap aıtqanda, reseılik-qazaqstandyq kooperatsııa aıasynda birlesken is-qımyl jospary, Qazaqstan Respýblıkasy Úkimeti men Reseı Federatsııasy Úkimeti arasynda «Baıqońyr» keshenin gazben jabdyqtaý jónindegi kelisim, QR Tsıfrlyq damý, qorǵanys jáne aeroǵarysh ónerkásibi mınıstrligi men RF Ónerkásip jáne saýda mınıstrligi arasynda óndiristik jáne ǵylymı-tehnıkalyq kooperatsııa kásiporny salasyndaǵy yntymaqtastyq týraly ekijaqty jospar rásimdeldi.
Qazaqstandyq jýrnalısterge suhbat bergen QR Indýstrııa jáne ınfraqurylymdyq damý mınıstri Roman Sklıardyń aıtýynsha, QR Indýstrııa jáne ınfraqurylymdyq damý mınıstrligi men RF Ónerkásip jáne saýda mınıstrligi arasynda qol qoıylǵan ónerkásiptik kooperatsııany damytýdyń birlesken is-qımyl jospary negizinen mashına jasaý salasyna qatysty.
«Mashına jasaý ónimderin jáne elderimizdiń aýmaǵynda shyǵarylatyn ónimderdi oqshaýlaý boıynsha belsendi jumys júrgizý qajet ekendigin túsinemiz. Ol kásiporyndarymyz úshin derbes quzyrettilik paıda bolýy turǵysynan mańyzdy jáne ózge de salalarǵa taralatyn bolady. Sondyqtan reseılik seriktespen jáne jartylaı bizdiń eldiń komanııasymen birge «KamAZ», «Kırovets» úlken traktoryn shyǵaratyn Peterbor traktor zaýyty syndy kásiporyndarǵa bólshekter jetkizý týraly sheshim qabyldandy»,- dedi mınıstr.
Onyń atap ótýinshe, búgin qol qoıylǵan jol kartasy ashyq sıpatqa ıe jáne ónerkásiptik kooperatsııaǵa qatysýǵa nıet tanytqan ózge de túrli kásiporyndarmen tolyǵyp otyratyn bolady.
«Bul baǵdarlamanyń ýaqyty óte tyǵyz. Aǵymdaǵy jyldyń ózinde elimizdiń Qostanaı, Nur-Sultan, Shymkent jáne ózge de qalalarynda birqatar joba iske qosylatyn bolady. Biz oǵan úlken senim artyp otyrmyz. Ol kezinde elderimizdiń arasynda bolǵan ónerkásiptik kooperatsııany qaıta jańǵyrtýǵa septigin tıgizedi dep úmittenemiz», - dedi R.Sklıar.
Avtor: Medet Ahmetov
