Qazaqstanda reseılik JOO-lardyń fılıalyn ashýdy retteıtin kelisim ázirlendi
«Ashyq» NQA portalynda jarııalanǵan kelisim jobasynda elimizde reseılik joǵary oqý oryndarynyń fılıaldaryn ashý kezinde Qazaqstan tarapynan lıtsenzııa alý sharalary qamtylǵan.
«Qazaqstan fılıalynda joǵary bilim berý baǵdarlamalaryn meńgergen jáne qorytyndy attestattaýdan oıdaǵydaı ótken bilim alýshylarǵa QR zańnamasyna sáıkes belgilengen úlgidegi bilim týraly qujattar beriledi. Al Reseı fılıalynda joǵary bilim berý baǵdarlamalaryn meńgergen jáne qorytyndy attestattaýdan oıdaǵydaı ótken bilim alýshylarǵa RF zańnamasyna sáıkes belgilengen úlgidegi bilim jáne biliktilik týraly qujattar beriledi», - dep jazylǵan qujatta.
Kelisim sheńberinde Qazaqstanda qurylatyn Reseıdiń joǵary bilim berý uıymdarynyń fılıaldaryn lıtsenzııalaý kezinde el úkimeti ózge de talaptar bekitýge quqyly.
«Fılıalda oqytylýy múmkin kásipterdiń, mamandyqtardyń jáne daıarlaý baǵyttarynyń tizbelerin kishi komıssııa aıqyndaıdy. Fılıaldarda oqytý fılıaldar ornalasqan eldegi bilim berý tiline qoıylatyn talaptar eskerile otyryp, bilim berý baǵdarlamalary sheńberinde fılıaldar ornalasqan eldiń memlekettik tili jáne tarıhy mindetti túrde oqytyla otyryp, eki eldiń memlekettik tilderinde júrgizilýi múmkin», - delingen kelisim jobasynda.
Kúshine enýi múmkin kelisim 5 jyl boıy qoldanysta bolady. Eger Qazaqstan men Reseı Úkimetteri tıisti kezeń aıaqtalǵanǵa deıin 1 jyldan keshiktirmeı kelisimdi toqtatý nıeti týraly jazbasha habarlama jibermese, kelesi besjyldyq merzimge avtomatty túrde uzartylady.
Qujat 24 naýryzǵa deıin kópshilik talqylaýda bolady.
