Qazaqstanda reseılik «Spýtnık V» vaktsınasyn óndirýge qansha qarajat bólindi

NUR-SULTAN. QazAqparat – QR Densaýlyq saqtaý mınıstri Alekseı Tsoı reseılik «Spýtnık V» vaktsınasyn óndirýge qansha qarajat bólingeni týraly suraqqa jaýap berdi, dep habarlaıdy QazAqparat tilshisi.

«Qaraǵandyda vaktsına óndirýge 15 mıllıard 175 mıllıon teńge bólindi. Jalpy reseılik vaktsınaǵa 18 mıllıard teńge bólý josparlanǵan», - dep jaýap berdi mınıstr Ortalyq kommýnıkatsııalar qyzmetindegi brıfıngte tilshi suraǵyna.

Vaktsınanyń birinshi partııasy Qazaqstanǵa eki doza úshin 26 dollar baǵasymen jetkizilgen.

«Biz Reseı aýmaǵynan tys jalǵyz eksklıýzıvti jetkizýshiden – tikeleı ınvestıtsııalar qorynan resmı hat aldyq, onda baǵany tómendetý máselesi qaıta qaralýy múmkin ekeni jazylǵan. Bári ónimniń jappaı shyǵarylýyna baılanysty, qazirgi ýaqytta ol 26 dollar turady», - dedi Alekseı Tsoı.