Qazaqstanda rentgen, KT jáne MRT nátıjesin qashyqtan baǵalaıtyn júıe iske qosylady
ASTANA. KAZINFORM – Jańa júıe shalǵaı óńirlerdegi turǵyndardyń medıtsınalyq zertteý nátıjelerin bilikti dárigerlerge qashyqtan oqytyp, ýaqytyly qorytyndy alýǵa múmkindik beredi. Bul týraly Ulttyq ǵylymı densaýlyq saqtaýdy damytý ortalyǵynyń basqarma tóraǵasynyń orynbasary Ádilet Tabarov aıtty.
Spıkerdiń sózinshe, elimizde 2026–2027 jyldary sáýleli zertteýlerdiń (rentgen, kompıýterlik tomografııa jáne magnıttik-rezonanstyq tomografııa) nátıjelerin qashyqtan baǵalaýǵa múmkindik beretin biryńǵaı júıeni damytý josparlanǵan.
– Qazirgi tańda qashyqtan medıtsınalyq kómek kórsetý júıesin keńeıtý jalǵasyp jatyr. Medıtsınalyq uıymdarǵa jańa tsıfrlyq sheshimder engizilip, telemedıtsınalyq platformalar qoldanystaǵy medıtsınalyq júıelermen biriktiriledi. Jospardaǵy negizgi baǵyttardyń biri – ortalyqtandyrylǵan teleradıologııany damytý bolyp otyr. Onyń aıasynda rentgen, KT jáne MRT nátıjeleri beıindi medıtsınalyq uıymdardyń mamandaryna onlaın jiberilip, olar qashyqtan qorytyndy beretin bolady, - dedi ol.
Onyń aıtýynsha, bul bilikti dıagnostıkanyń qoljetimdiligin arttyryp, zertteý qorytyndysyn shyǵarý ýaqytyn qysqartady. Sondaı-aq rentgenolog tapshy óńirlerde mamandardyń jumysyn tıimdi uıymdastyrýǵa múmkindik bermek.
Budan bólek, mektep medıtsınasy men profılaktıka baǵyty aıasynda 6 myńnan astam mektep pen 3 mıllıonnan astam oqýshy tsıfrlyq júıemen qamtylady. Bul profılaktıkalyq tekserýlerdi júrgizýge, qashyqtan konsýltatsııa berýge jáne balalardyń densaýlyǵyn turaqty baqylaýǵa múmkindik beredi.
Aıta keteıik, buǵan deıin Densaýlyq saqtaý mınıstrligi telemedıtsınalyq qyzmetterdi damytýǵa jańa standarttar engizgen edi.
