Qazaqstanda rekordtyq kólemde astyq jınaldy
ASTANA. KAZINFORM – Bıyl kóktemgi sý tasqynyna qaramastan, 26,7 mln tonna astyq jınaldy. Bul – keıingi 10 jyldaǵy rekordtyq kórsetkish. QR Prezıdentiniń keńesshisi – Baspasóz hatshysy Berik Ýálı Egemen Qazaqstan gazetinde Prezıdenttiń agroónerkásip keshenin damytý bastamalary týraly aıtyp berdi.
– Memleket basshysy agroónerkásip kesheniniń áleýetin arttyrýǵa aıryqsha mán beredi. Shetelge saparlarynda osy salanyń ınvestıtsııalyq múmkindikterin udaıy tanystyryp júredi. Bıyl kóktemgi sý tasqynyna qaramastan, 26,7 mln tonna astyq jınaldy. Bul – keıingi 10 jyldaǵy rekordtyq kórsetkish. Muny memlekettiń dıqandarǵa kórsetken júıeli qamqorlyǵy men qoldaýynyń nátıjesi deýge bolady, – dep jazdy Berik Ýálı.
Bıyl kóktemgi egin jáne jıyn-terin jumystaryna 5 paıyz mólsherlememen tikeleı jeńildetilgen nesıe berile bastady. Ol úshin alǵash ret jarty trıllıon teńgeden asa qarjy qarastyryldy.
– Negizgi azyq-túlik taýarlary boıynsha ımportqa táýeldilikti azaıtý – mańyzdy mindet. Osy baǵytta birqatar joba iske asyryldy. Dándi-daqyldar selektsııasy men tuqym sharýashylyǵyn damytý týraly keshendi jospar qabyldandy. Dıqandar otandyq tuqymmen qamtamasyz etilýge tıis, - deıdi keńesshi.
Sonymen qatar aýyl sharýashylyǵy tehnıkasyn jańartý deńgeıin jylyna 8-10 paıyzǵa deıin jetkizý úshin 120 mlrd teńge bólindi. Tehnıkany 5 paıyzdyq mólsherlememen lızıngke berý baǵdarlamasy bastaldy.
Óndirilgen azyq túlikti saqtap, tutynýshyǵa jetkizýge qoıma-logıstıka keshenderi kerek. Aldaǵy jyldary syıymdylyǵy 700 myń tonna bolatyn qoımalar salynady.
– Jalpy, bıyl alǵash ret ótken Qazaqstannyń aýyl sharýashylyǵy eńbekkerleriniń birinshi forýmynda agroónerkásip keshenin damytýdyń negizgi mindetteri aıqyndaldy. Onda kóptegen is-sharamen qatar, qazaq jylqysynyń tuqymyn saqtaý jáne kóbeıtý úshin arnaıy zań qabyldanǵany aıtylyp, endi bul baǵytta taǵy bir mańyzdy qadam retinde Úkimetke Jylqy sharýashylyǵy ınstıtýtyn qurý jóninde tapsyrma berildi, - dedi B. Ýálı.
Aıta keteıik, Berik Ýálı Memleket basshysy Qasym-Jomart Toqaevtyń jyl boıy atqarǵan qyzmetine sholý jasap, qoǵamdyq-saıası ómirdegi, áleý¬mettik-ekonomıkalyq damý¬daǵy irgeli ózgerister men tabys-tar týraly baıandady.
Prezıdent bıyl jumys saparymen elimizdiń 11 óńirine bardy. Aımaqtardaǵy 60-tan asa óndiristik jáne áleýmettik-mádenı nysandarmen tanysyp, jurtshylyqpen kezdesti.
Sondaı-aq, Memleket basshysy bıyl 3 979 qujatty qarap, qol qoıdy. Onyń ishinde 95 zań, 319 jarlyq, 81 ókim, 28 otyrys hat¬ta¬masy, 3 456 qyzmettik qujat qabyldandy.