Qazaqstanda referendým joǵary deńgeıde uıymdastyrylǵan – Mahmadalı Vatanzoda
ASTANA. KAZINFORM – Qazaqstanda ótip jatqan referendým joǵary deńgeıde uıymdastyrylǵan. Muny Tájikstan Respýblıkasy Olı Májilisiniń Konstıtýtsııalyq negizder, adam quqyqtary men bostandyqtary, azamattyq jáne zańdylyqty qamtamasyz etý jónindegi komıtetiniń tóraǵasy Mahmadalı Vatanzoda aıtty.
Halyqaralyq baıqaýshynyń sózinshe, referendým barysyn baqylaý barysynda birneshe ýchaskelik komıssııanyń jumysy zerdelengen.
– Respýblıka aýqymdy jumys atqarǵany baıqalady. Biz barǵan ondaǵan ýchaskelik komıssııalarda tártip saqtalǵan. Esh jerde asyǵys áreket te, qandaı da bir máseleler de baıqalmady. Erkin, demokratııalyq ári ashyq daýys berý úshin barlyq jaǵdaı jasalǵan, – dedi ol.
Mahmadalı Vatanzoda referendýmǵa halyqtyń belsendi qatysyp jatqanyn da erekshe atap ótti.
Onyń aıtýynsha, daýys berýge ásirese aǵa býyn ókilderi belsendi qatysyp, kópshilik azamattar ýchaskelerge otbasymen kelip jatyr.
– Biz barǵan ýchaskelerde adamdardyń balalarymen birge kelgenin kórdik. Keıbir kishkentaı balalar ata-analarymen birge bıýlletenderdi jáshikke salyp, erekshe qýanyp jatty. Daýys berý jáshikteriniń janynda sýretke túsip jatqan sátter de kóp boldy. Jalpy, saılaý ýchaskelerinde merekelik kóńil-kúı sezildi, – dedi halyqaralyq baıqaýshy.
Onyń pikirinshe, azamattardyń referendýmǵa belsendi qatysýy qoǵamdaǵy saıası sananyń joǵary ekenin kórsetedi.
– Halyqtyń belsendiligi baıqalady. Sondyqtan keshke qaraı daýys berýge qatysýshylardyń úlesi joǵary bolady dep oılaımyn, – dep túıindedi Mahmadalı Vatanzoda.
Aıta keteıik, buǵan deıin Tájikstandaǵy qazaqstandyqtar referendýmda belsendilik tanytyp jatqanyn jazǵanbyz.
