Qazaqstanda radıolokatsııalyq tehnıka shyǵaratyn zaýyt ashyldy

ASTANA. QazAqparat - Búgin Almaty oblysynda Qazaqstan Respýblıkasynyń Qorǵanys jáne aeroǵarysh ónerkásibi vıtse-mınıstri Arman Ramazanovtyń qatysýymen úsh koordınataly radıolokatsııalyq stantsııalardy shyǵaratyn «Groud Master 400» (qazaqstandyq ındeksi - «NUR») Qazaqstan men Frantsııanyń birlesken kásiporny ashyldy. Bul týraly atalǵan mınıstrliktiń baspasóz qyzmeti habarlaıdy.

Osy jobanyń qatysýshylary - Qazaqstanda santımetrlik dıapazon tolqyndardyń úsh koordınataly radıolokatsııalyq stantsııalaryn shyǵaratyn «Groud Master 400» men «Kazaqstan ınjınırıng» UK» AQ quramyna kiretin «Granıt» arnaıy konstrýktorlyq-tehnologııalyq bıýro» JShS jáne «Tales» kompanııasy (Frantsııa) ekijaqty memorandýmǵa qol qoıǵan.

Osyndaı joba qazaqstandyq armııanyń, sondaı-aq osy óńir memleketteriniń muqtajdyqtaryn qamtamasyz etý úshin Ortalyq Azııada alǵash ret júzege asyrylyp otyr. Ony iske asyrý kezinde óndiristik stantsııalardy respýblıka aýmaǵynda shyǵarylatyn toraptarmen, agregattarmen, baılanys quraldarymen jáne arnaıy avtomobıl tehnıkasymen jıyntyqtaı otyryp, oqshaýlandyrýdyń 70%-dan astam deńgeıine qol jetkizý josparlanýda. «Granıt-Tales Elektronıks» JShS-ta 150-den astam jumys orny quryldy, tehnologııalardy transfertteý kózdelýde.

Qazaqstanda shyǵarý josparlanatyn radıolokatsııalyq tehnıka óziniń taktıkalyq-tehnıkalyq sıpattamasy boıynsha álemdegi eń úzdikterdiń biri bolyp tabylady, ol radıolokatsııalyq barlaýǵa jáne áýe keńistigin baqylaýǵa arnalǵan.

Joba sheńberinde radıolokatsııalyq tehnıkanyń perspektıvti tıpterin shyǵarýdy meńgerýge bolatyndyǵyn atap ótken jón.