Qazaqstanda iri shınalardy qaıta óńdeý tártibi ózgerýi múmkin
ASTANA. KAZINFORM — Qazaqstanda iri jáne asa iri gabarıtti shınalardy jınaý men qaıta óńdeýdi jeńildetý usynylyp otyr. Ekologııa mınıstrligi shınalardy tasymaldaý aldynda qaldyq túziletin oryndardyń ózinde aldyn ala kesý múmkindigin qarastyrmaq. Bul tasymaldaý shyǵynyn azaıtyp, shınalardy qaıta óńdeýge tezirek jiberýge múmkindik beredi. Bul týraly Ekologııa jáne tabıǵı resýrstar mınıstrligi málim etti.
Vedomstvo «Jasyl damý» AQ jáne iri gabarıtti jáne asa iri gabarıtti shınalardy (ІGSh jáne AІGSh) qaıta óńdeýmen aınalysatyn kásiporyndardyń ókilderimen birlesip, olardy jınaý, tasymaldaý jáne qaıta óńdeýge berý protsesterin jetildirý máseleleri boıynsha jumys keńesin ótkizdi.
Jumys keńesi barysynda jınaqtalǵan ІGSh jáne AІGSh-men jumys isteý tıimdiligin arttyrýǵa baǵyttalǵan kásiporyndardyń usynystary qaraldy.
— Usynystardyń biri qaldyqtar túziletin oryndardyń alańdarynda shınalardy aldyn ala kesýdi uıymdastyrýdy kózdeıdi. Bul tásil tasymaldaýǵa jatatyn shınalardyń kólemin azaıtýǵa, kólik shyǵyndaryn qysqartýǵa jáne jınaqtalǵan qaldyqtardy qaıta óńdeýge berýdi jedeldetýge múmkindik beredi, — delingen habarlamada.
Jumys keńesiniń qorytyndysy boıynsha usynystardy pysyqtaý jumysy múddeli memlekettik organdardyń, «Jasyl damý» AQ-nyń jáne sala kásiporyndarynyń qatysýymen jalǵasatyn bolady.
Buǵan deıin Qostanaıda shına qaldyqtary qaıta óńdelip, kádege jaratylatynyn jazdyq.
