Qazaqstanda iri saýda nysandaryn saqtandyrý júıesi engizilip jatyr

ASTANA. KAZINFORM — QR Tótenshe jaǵdaılar vıtse-mınıstri Kegen Tursynbaev azamattyq qorǵaý salasyndaǵy jańa zań normalaryn túsindirdi.

Atalǵan zańnyń iske asyrylýy azamattyq qorǵaý organdary qyzmetkerleriniń áleýmettik jáne quqyqtyq jaǵdaılaryn jaqsartýǵa, sondaı-aq tótenshe jaǵdaılardy aldyn alý men olardy joıý jumystarynyń jalpy tıimdiligin arttyrýǵa baǵyttaldy.

— Adamdar jappaı baratyn obektilerde jáne bıiktigi 28 metrden asatyn ǵımarattarda órt qaýipsizdigin qamtamasyz etý maqsatynda mınıstrliktiń aýmaqtyq organdary nysandy paıdalanýǵa berý kezinde olardyń órt qaýipsizdigi talaptaryna sáıkestigi týraly qorytyndy shyǵarady. Bul normany engizý órt qaýipsizdigi talaptaryn buzǵan obektilerdi iske qosý jáne odan ári paıdalaný faktileriniń aldyn alýǵa múmkindik beredi, — dedi Kegen Tursynbaev Ortalyq kommýnıkatsııalar qyzmetindegi baspasóz máslıhatynda.

Sonymen qatar, zardap shekkenderge keltirilgen zalaldy óteý úshin aýdany 2 myń sharshy metrden asatyn saýda nysandaryn saqtandyrý júıesi engizilip jatyr.

— Órt avtomatıkasyn montajdaýǵa jáne tehnıkalyq qyzmet kórsetýge ruqsat berý, sondaı-aq «Han Shatyr men EKSPO sııaqty obektilerdi salýǵa arnalǵan arnaıy tehnıkalyq sharttardy kelisý týraly normalar engizildi, — dedi vıtse-mınıstr.

Budan basqa, tótenshe jaǵdaılar qaýpi týyndaǵan nemese oryn alǵan kezde, halyqty jedel habardar etý salasynda mańyzdy ózgerister engizildi. Atap aıtqanda, jedel-kezekshi qyzmettiń jaýapty ókilderi ýákiletti laýazymdy tulǵalardyń aldyn ala buıryǵynsyz habarlandyrý júıesin óz sheshimimen iske qosa alady. Mundaı qadam sheshim qabyldaý ýaqytyn qysqartyp, halyqtyń qaýipsizdigin joǵary deńgeıde qamtamasyz etedi.

Eske salsaq, bıyl 24 maýsymda Memleket basshysy «Qazaqstan Respýblıkasynyń keıbir zańnamalyq aktilerine azamattyq qorǵaý, elektr energetıkasy jáne memlekettik múlikti basqarý máseleleri boıynsha ózgerister men tolyqtyrýlar engizý týraly» Zańyna qol qoıdy.