Qazaqstanda iri bordaqylaý kesheni salynyp jatyr: eksport geografııasy keńeıedi
ASTANA. KAZINFORM — Túrkistan oblysynda 50 myń bas iri qaraǵa arnalǵan bordaqylaý kesheni bıylǵy jyldyń shilde aıynda paıdalanýǵa beriledi. Bul týraly AShM-niń baspasóz qyzmeti málim etti.
Óńirde agroónerkásip keshenindegi iri ınvestıtsııalyq jobalardyń biri — 50 myń bas iri qara malǵa arnalǵan bordaqylaý kesheniniń qurylysy júrgizilýde. Nysandy tolyq qýatyna shyǵarý 2026 jyldyń shilde aıyna josparlanǵan.
Joba «Turkestan Agro.kz» JShS bazasynda iske asyrylýda jáne azyq-túlik qaýipsizdigin qamtamasyz etýge, eksportqa baǵyttalǵan óndiristi damytýǵa, sondaı-aq otandyq agrosektordyń básekege qabilettiligin arttyrýǵa baǵyttalǵan.
— Jobany iske asyrý memlekettik qoldaý sharalary men jeke ınvestıtsııalardy tartý arqyly kezeń-kezeńimen júrgizilýde. Birinshi kezeńde bordaqylaý keshenin salýǵa 2,9 mlrd teńge baǵyttaldy, qosymsha 1,5 mlrd teńge jeńildetilgen qarjylandyrý quraldary aıasynda jańbyrlatyp sýarý júıelerin engizýge bólindi. Qazirgi tańda joǵary ónimdi 30 myń bas mal satyp alynyp, ony kezeń-kezeńimen jobalyq qýat — 50 myń basqa deıin jetkizý kózdelgen, — delingen habarlamada.
Ekinshi kezeńde memlekettik qoldaý kólemi 5,9 mlrd teńgeni qurady, sonymen qatar jeke ınvestıtsııalar tartý jalǵasady.
— Keshen zamanaýı, eýropalyq deńgeıdegi tehnologııalarmen jabdyqtalýda. Barlyq óndiristik protsester — azyqtandyrý, kútip-baǵý jáne veterınarlyq qyzmet kórsetý — avtomattandyrylǵan jáne tıimdilik pen bıologııalyq qaýipsizdik boıynsha halyqaralyq standarttarǵa sáıkes keledi. Óndiristik tsıkl maldyń kúızelisin azaıtyp, ónimdiligin arttyrýǵa múmkindik beretin avstralııalyq tor qaǵıdatyna negizdelgen tehnologııa boıynsha uıymdastyrylǵan, — dep habarlady vedomstvodan.
Joba aıasynda turaqty jem-shóp bazasyn qalyptastyrýǵa erekshe nazar aýdarylǵan. 4710 gektar aýmaqta zamanaýı jańbyrlatyp sýarý júıeleri engizilgen. Kún saıynǵy jem-shóp daıyndaý kólemi 500 tonnaǵa deıin jetedi.
Sonymen qatar saǵatyna 20 tonna túıirshiktelgen jem óndiretin quramajem zaýyty iske qosylǵan. Bolashaqta jylyna 1 mln tonna jem óndiretin zaýyt salý josparlanýda.
Kásiporynda sýmen jabdyqtaýdyń zamanaýı júıeleri jáne qorshaǵan ortany qorǵaý talaptaryna sáıkes qaldyqtardy ekologııalyq qaýipsiz kádege jaratý júıeleri engizilgen.
Qazirgi kezeńde 30-dan astam jumys orny qurylǵan, al keshen tolyq qýatyna shyqqanda bul kórsetkish 100 jumys ornyna deıin ulǵaıady.
Joba ınvestory Syrym Ertaevtyń aıtýynsha, óndirilgen ónim qazirdiń ózinde Qazaqstannyń ishki naryǵyna jetkizilip, sondaı-aq Ózbekstan men Tájikstanǵa eksporttalyp otyr.
Orta merzimdi kezeńde Túrkııa jáne basqa da elderdiń naryǵyna shyǵý josparlanyp otyr. Bul eksport geografııasyn keńeıtip, eksporttyq túsimdi arttyrýǵa múmkindik beredi.
Aldaǵy ýaqytta joba aıasynda bir aýysymda 1500 bas iri qara jáne 5000 bas usaq mal óńdeıtin et óńdeý keshenin salý kózdelgen. Sonymen qatar ónimdi tereń óńdeý arqyly qosylǵan quny joǵary daıyn ónimderdiń keń assortımentin shyǵarý josparlanýda. Atalǵan ónimder ishki naryqpen qatar Qytaı men Túrkııa sııaqty syrtqy naryqtarǵa baǵyttalmaq.
Buǵan deıin Úkimet basshysy mal sharýashylyǵynda ónimdilikti ulǵaıtýdy tapsyrǵan bolatyn.
