Qazaqstanda Qorgau jobasy bastaldy
ALMATY. QazAqparat – Qazaqstanda azamattar quqyn qorǵaý úshin tegin ári qoljetimdi ınfraqurylymdy qurýǵa baǵyttalǵan Qorgau jobasy bastaldy, dep habarlaıdy QazAqparat tilshisi.
Jobanyń maqsaty – ómirlik qıyn jaǵdaıda qalǵan turǵyndardyń bilim deńgeıin kóterý.
1 tamyzdan bastap barlyq qala jáne aýdan ortalyqtarynda 210 zań keńesi bólimi ashylady. Qalaǵan adam osy bólimderge baryp, buqara quqyn qorǵaýdyń búkil mańyzdy baǵyttary boıynsha quqyqtyq kómek alýyna bolady.
Osy joba aıasynda zań fakýltetteri stýdentterin taǵylymdamadan ótkizý, «áleýmettik» zańgerler qoǵamdastyǵyn qurý, «Aıt!» aqparattyq-túsindirý aktsııasyn ótkizý, t.b. kózdelip otyr.
«Joba aıasynda barlyq saladaǵy quqyq qorǵaý uıymdarymen memorandým jasalady. Keıde aıryqsha jaǵdaılar bolyp jatady, aıtalyq bireý bankpen sottasýy múmkin. Bular bank isi salasyndaǵy zańdy tulǵa men jeke tulǵa arasyndaǵy názik máseleler. Mundaıda osy salanyń mamandary shaqyrylady», - deıdi jobanyń Almaty qalasy boıynsha úılestirýshisi Altynaı Kóbeeva.
Onyń aıtýynsha, búginniń ózekti máseleleri retinde memleketten áleýmettik jeńildikter alý, ajyrasý protsesiniń máseleleri, múlik aıyrysý, alaıaqtyq, jumysqa ornalasý, taǵy basqalardy aıtýǵa bolady.
Aıta keteıik, osy joba «Biryńǵaı Call-ortalyq qurý arqyly «Quqyq qorǵaýshy» keshendi jobasyn iske asyrý» granty aıasynda iske asyrylýda. Oǵan «Azamattyq bastamalardy qoldaý ortalyǵy» KEAQ qoldaý kórsetip, QR Aqparat jáne qoǵamdyq damý mınıstrligi qolǵabys etip otyr.
Avtor:Elaman Turysbekov
