Qazaqstanda «Qazaq Air» áýe kompanııasy quryldy

ASTANA. QazAqparat - «Samuryq-Qazyna» ulttyq ál aýqat qory» AQ «Qazaq Air» AQ enshiles kompanııasynyń qurylǵandyǵy týraly málimdedi, dep habarlaıdy Qazaqstan qor bırjasynyń saıty.

«Samuryq-Qazyna» basqarmasynyń 2015 jylǵy 19 qańtardaǵy № 02/15 sheshimimen jarǵylyq kapıtalynda qordyń júz paıyzdyq qatysýymen «Qazaq Air» AQ quryldy. Kompanııany qurýǵa QR Ulttyq ekonomıka mınıstrligi Tabıǵı monopolııalardy retteý jáne básekelestikti qorǵaý komıtetiniń kelisimin alǵan jaǵdaıda 2015 jylǵy 30 qańtardaǵy № 117 sheshimimen Qordyń dırektorlar keńesi «Qazaq Air» AQ-nyń 100 paıyz aktsııasyn alý týraly ýaǵdalasty»,-delingen habarlamada.

Aıta keteıik, atalǵan áýe kompanııasynyń keńsesi Astanada ornalasqan. Onyń negizgi qyzmeti Qazaqstan Respýblıkasy halqy qajettiligin qanaǵattandyrý maqsatynda óńirlik jáne halyqaralyq jolaýshylar tasymalyna, sondaı-aq júkterdiń tasymalyna baǵyttalǵan.