Qazaqstanda PTR-testileý baǵasy arzandaýy múmkin
NUR-SULTAN. QazAqparat – QR Premer-Mınıstriniń orynbasary Eraly Toǵjanov Qazaqstanda PTR-testileý baǵasyn arzandatý jospary týraly aıtyp berdi, dep habarlaıdy QazAqparat tilshisi.
«Meniń oıymsha, PTR (test – red.) baǵasy qymbattamaıdy. Birinshiden, bizdiń azamattar vaktsınany tańdaıdy dep oılaımyn. Oǵan bek senimdimin. Qazirgi vaktsınalaý qarqyny da osyny aıǵaqtaıdy. Ekinshiden, PTR-testileýdiń ortasha baǵasy 7-8 myń teńge deńgeıinde. Jaqynda ǵana vedomstvoaralyq komıssııada kásipkerler baǵany arzandatyp, ári qaraı Eýropa elderinde qoldanylatyn jańa PTR-testini alýdy usyndy. Olar jańa tásilder usynyp otyr. Densaýlyq saqtaý mınıstrligi Básekelestikti qorǵaý jáne damytý agenttigimen jáne kásipkerlermen birge bul máseleni qarastyryp jatyr. Sondyqtan, eń aldymen, biz baǵany tómendetý múmkindigin qarastyramyz», - dep jaýap berdi spıker Ortalyq kommýnıkatsııalar qyzmetinde tilshi suraǵyna.
Sondaı-aq, Premer-Mınıstrdiń orynbasary vaktsınalaýǵa qatysty aqparattyq jumysqa baǵa berdi.
«Ózderińiz bilesizder, búginde Qazaqstanda jalpy jaǵdaı turaqtalǵan. Kúndelikti ósim 1200 adam deńgeıinde, meniń oıymsha, bul óte mańyzdy nátıjeler. Biz qabyldaǵan sharalar sońǵy jaǵdaıǵa baılanysty bolyp otyr. Bizdiń áreket etpeýge quqyǵymyz joq, onyń ústine Qazaqstanda barlyq belgileri bar aıqyn qaýip tónip tur. Aqparattyq-túsindirý jumystary barlyq jerde júrip jatyr. Biraq biz munyń jetkiliksiz ekenin túsinemiz jáne qosymsha sharalar qabyldaýǵa májbúrmiz. Bul birinshi kezekte azamattarymyzdyń qaýipsizdigin, densaýlyǵyn qorǵaý men qamtamasyz etýge baǵyttalǵan. Osy turǵydan bizdi durys túsinýlerińizdi suraımyn», - dedi Eraly Toǵjanov.
