Qazaqstanda PTR ádisimen 662 myń test júrgizildi – Bas sanıtarlyq dáriger

NUR-SULTAN. QazAqparat – Naýryz aıynan beri Qazaqstanda PTR ádisimen 662 myń test júrgizildi. Bul týraly QR Bas memlekettik sanıtar dáriger Aıjan Esmaǵambetova aıtyp berdi, dep habarlaıdy QazAqparat tilshisi.

«Munda bir adamǵa birneshe test júrgiziledi. Máselen, búginge deıin 662 myń test júrgizilip, 8 969 naýqas anyqtaldy. Testileýden ótýi múmkin adamdar úsh topqa bólinedi. Eń aldymen naýqaspen baılanysta bolǵandar jáne koronavırýs ınfektsııasyna kúdigi barlar testke jiberiledi. ıAǵnı, naýqastarǵa ǵana emes, vırýsty juqtyrý kúdigi bar adamdardyń ózine birneshe test jumsalady. Sondyqtan, test pen naýqastar sany bir-birine sáıkes kelmeıdi», - dedi bas sanıtarlyq dáriger QR Densaýlyq saqtaý mınıstrliginiń Facebook-tegi baspasóz máslıhatynda.

Spıkerdiń aıtýynsha, óńirlerde test jasaıtyn zerthanalar sany artady.

«Naýryz aıynda bir táýlikte myńǵa jeter-jetpes test júrgizetin edik. Eki jarym aıdyń ishinde zerthanalar sanyn kóbeıttik, jeke sektordy iske tarttyq. Osylaısha, qazir bir táýlikte eń joǵarǵy kórsetkish 23 myńǵa jetti. Naýryz aıynda elimizde 19 zerthana bolsa, qazir 54 zerthanada test alynady. Odan bólek, óńirlerde de qosymsha zerthanalar ashýdy josparlap otyrmyz», - dedi Aıjan Esmaǵambetova.