Qazaqstanda psıhologtardyń biliktiligin tekserýdiń jańa tetigi engiziledi
ASTANA. KAZINFORM – Qazaqstanda psıhologtardyń biryńǵaı memlekettik tizilimi qurylady. Onyń kómegimen azamattar mamannyń dıplomyn, biliktiligin jáne kásibı tájirıbesin teksere alady. Bul týraly L.N. Gýmılev atyndaǵy Eýrazııa ulttyq ýnıversıtetiniń psıhologııa kafedrasynyń meńgerýshisi Álııa Mámbetalına BIZDIÑ ORTA podkastynda aıtty.
Onyń málimdeýinshe, zań kúshine engennen keıin psıhologııalyq qyzmet kórsetetin mamandardyń barlyǵy qujattaryn usynyp, tıisti bilimin rastaýǵa tıis. Biryńǵaı tizilimge tek profıldik bilimi men biliktiligi rastalǵan psıhologtar engiziledi.
Reestrde mamannyń dıplomy, kásibı biliktiligi jáne biliktilikti arttyrý týraly málimetteri kórsetiledi. Sondaı-aq ár psıhologqa jeke sáıkestendirý nómiri berilip, ony áleýmettik jelidegi nemese ózge onlaın platformalardaǵy paraqshasyna ornalastyrý múmkindigi qarastyrylady.
Osy silteme arqyly azamattar psıhologtyń kásibı daıarlyǵy men biliktiligin ońaı teksere alady. Sarapshynyń aıtýynsha, psıhologııa salasynda úzdiksiz bilim alý mańyzdy bolǵandyqtan, mamannyń kásibı damýy týraly aqparat ta qoljetimdi bolmaq.
Álııa Mámbetalınanyń pikirinshe, biryńǵaı tizilim psıhologııalyq qyzmet kórsetý naryǵyn retteýge jáne arnaıy bilimi joq adamdardy kásibı psıhologtardan ajyratýǵa múmkindik beredi.
Jańa tártipke sáıkes, memlekettik tizilimge engizilmegen mamandar psıhologııalyq kómek kórsetýge jáne ózin psıholog retinde tanystyrýǵa quqyly bolmaıdy.
Eske sala keteıik, buǵan deıin, Senat «Psıhologııalyq qyzmet týraly» zańdy maquldaǵan bolatyn.
