Qazaqstanda psıhıkalyq densaýlyq saqtaý júıesin aýqymdy reformalaý bastalady
ASTANA. KAZINFORM - Qazaqstanda halyqtyń psıhıkalyq densaýlyǵyn saqtaý tásilderi túbegeıli jańǵyrtylady. Endigi basymdyq aýrýdyń saldaryn emdeýge ǵana emes, onyń aldyn alýǵa, erte anyqtaýǵa jáne azamattarǵa medıtsınalyq kómektiń barlyq kezeńinde júıeli qoldaý kórsetýge baǵyttalady.
QR Úkimeti baspasóz qyzmetiniń habarlaýynsha, bul sharalar Psıhıkalyq densaýlyqty saqtaý jónindegi 2027–2030 jyldarǵa arnalǵan jańa keshendi josparda kózdelgen. Atalǵan keshendi jospar QR Premer-mınıstriniń orynbasary – mádenıet jáne aqparat mınıstri Aıda Balaevanyń tóraǵalyǵymen Úkimette ótken keńeste qaraldy.
Jańa tásilder týraly densaýlyq saqtaý mınıstri Aqmaral Álnazarova baıandady. Qazirgi ýaqytta elimizde mamandandyrylǵan kómekti respýblıkalyq deńgeıdegi eki klınıka, óńirlerdegi 20 psıhıkalyq densaýlyq ortalyǵy, 98 bastapqy psıhıkalyq densaýlyq ortalyǵy jáne aýyldyq jerlerdegi 200-den astam psıhıkalyq densaýlyq kabıneti kórsetedi. Sonymen qatar júrgizilgen taldaý bul qyzmetti odan ári júıeli túrde damytý qajettigin kórsetti.
Jańa keshendi jospar psıhıkalyq densaýlyq salasyndaǵy mamandardy emhanalardyń jumysyna tartýdy, aýrýlardy erte anyqtaý júıesin jetildirýdi, patsıenttiń medıtsınalyq kómek alý baǵytyn tsıfrlandyrýdy, kadrlyq áleýetti nyǵaıtýdy jáne ınfraqurylymdy jańǵyrtýdy qamtıdy. Balalar men jasóspirimderdiń psıhıkalyq densaýlyǵyn qorǵaýǵa erekshe nazar aýdarylady.
Keshendi jospardy ázirleý barysynda salalyq memlekettik organdar ǵylymı zertteýlerdi damytýǵa, mamandar daıarlaý sapasyn arttyrýǵa, bilim berý baǵdarlamalaryn jańartýǵa, pedagogter men psıhologterdiń biliktiligin jetildirýge baǵyttalǵan usynystaryn engizdi. Sondaı-aq múgedektigi bar balalar men eresekterge arnalǵan arnaýly áleýmettik qyzmetter júıesi men tıisti ınfraqurylymdy odan ári damytý sharalary usynyldy.
Mınıstrlikter men óńir ákimdikteriniń baıandamalary tyńdalǵannan keıin Psıhıkalyq densaýlyqty saqtaý jónindegi 2027–2030 jyldarǵa arnalǵan keshendi jospar maquldandy.
Aıta keteııik, búgingi tańda Qazaqstanda psıhıkalyq, minez-qulyq aýytqýy bar 108 myńnan astam adam tirkeýde tur.
