Qazaqstanda Prjevalskıı jylqysyn ósirý qolǵa alynbaq
ASTANA. QazAqparat - Qazaqstanda Prjevalskıı jylqysynyń popýlıatsııasy qalpyna keltiriledi. Bul týraly búgin OKQ brıfınginde Qazaqstan Ulttyq geografııalyq qoǵamy Basqarý keńesiniń tóraǵasy Qanat Baıǵarın málimdedi.
«Qazaqstan Ulttyq geografııalyq qoǵamynyń alǵa qoıyp otyrǵan iri jobalarynyń biri - Prjevalskıı jylqylaryn qaıtadan qalpyna keltirý. Eger Qazaqstandaǵy eń sońǵy jolbarys 1947 jyly joǵalǵan bolsa, Prjevalskıı jylqysy 150 jyldan astam ýaqyt buryn joıylyp ketken. Degenmen, qalpyna keltirý anaǵurlym jeńilirek, óıtkeni janýarlardyń tirshiligine qolaıly ekojúıe elimizde bar.
Endi olardyń tirshilik etýine qolaıly oryndardy tańdap, atalyq-analyqtaryn ákelip, olardyń kóbeıýine jaǵdaı týǵyzý qajet. Bul jumystar jergilikti bılik organdarymen, orman sharýashylyǵymen jáne jergilikti turǵyndarmen birge júrgiziledi», - dep atap ótti ol.
Q. Baıǵarınniń aıtýynsha, jobanyń negizgi seriktesi bıoalýandylyqty saqtaý boıynsha Qazaqstandyq qaýymdastyq.
«Qaýymdastyq qazirdiń ózinde Ortalyq Qazaqstandaǵy qalpyna keltirilgen «Altyn dala» rezervatynda Prjevalskıı jylqylaryna qolaıly jaǵdaılar jasaýmen aınalysyp jatyr. Bul jumys ta keminde 20 jylǵa josparlanǵan. Bul rette Nemis zoobaqtarynan kómek kútilip otyr. Monǵol áriptesterimiz de qol ushyn sozýǵa ázir. Óıtkeni olardyń Prjevalskıı jylqysyn qalpyna keltirý tájirıbeleri óte mol. Sonymen qatar, QR Aýyl sharýashylyǵy mınıstrligi de jobany qoldaýǵa ázir ekendikterin bildirgen. Sondyqtan, bul joba sátti bolmaq», - dedi ol.
Mamannyń aıtýynsha, joba birshama qymbat turady. Sondyqtan bul baǵdarlamany Úkimet deńgeıinde qabyldaý qajet.
