Qazaqstanda prostatıt 100 paıyzǵa emdeledi - M. Alshynbaev
ASTANA. QazAqparat - Qazaqstanda er azamattardyń 45 paıyzy prostatıtke shaldyqqan. Bul týraly B.Jarbosynov atyndaǵy Ulttyq ýrologııa ortalyǵynyń jetekshisi, medıtsına ǵylymdarynyń doktory, professor Myrzakárim Alshynbaev málim etti.
«Byltyr erler densaýlyǵy ortalyǵyna 50 myńnan astam er azamat kelgen. Olardyń 44 paıyzy prostatıtpen kelgen. Bul - óte úlken kórsetkish. Qazaqstanda eńbekke qabiletti erlerdiń 45 paıyzy prostatıtpen aýyrady», - dedi ol tilshilerge bergen suhbatynda.
Professordyń aıtýyna qaraǵanda, prostatıt erlerdiń erektıldi dısfýnktsııasyna áser etedi, tipti bedeýlikke de ákeledi. Eger aýrýdy der ýaqytynda taýyp, emdeıtin bolsa, dertten tolyq aıyǵýǵa bolady.
M.Alshynbaevtyń sózi boıynsha, Qazaqstandaǵy Erler densaýlyǵy ortalyǵynda prostatıt tegin emdeledi.
«Emge qyrýar qarajat alatyn jeke menshik klınıkalar kóp. Sizder odan da Erler densaýlyǵy ortalyǵyna kelip, tegin em-dom alyńyz. Qymbat ortalyqtarǵa ózderi habarlasady, sosyn sonshalyqty nege qymbat degen áńgimeler týyp jatady. Sizderdi eshkim májbúrlemeıdi ǵoı. Aıta ketkim keledi, búginde prostatıt 100 paıyzǵa emdeledi», - dedi ol.
