Qazaqstanda problemalyq ıpoteka boıynsha kómekke júginý merzimi uzartyldy
ASTANA. KAZINFORM – Qazaqstanda ıpotekalyq nesıesin óteýde qıyndyqqa tap bolǵan azamattardyń qosymsha kómek alý úshin ótinish berý merzimi uzartyldy. Qarjy naryǵyn retteý jáne damytý agenttigi 2026 jylǵy 28 qyrkúıekte tıisti qaýly qabyldady.
Qujatqa sáıkes, qaryz alýshylar 2027 jylǵy 1 shildege deıin bankterge, Qazaqstan turǵyn úı kompanııasyna jáne baǵdarlamaǵa qatysatyn ózge de uıymdarǵa júgine alady.
Osy merzimge deıin qosymsha kómek alý, qoldanystaǵy nesıe sharttaryn jaqsartý, turǵyn úıdi qarjylandyrý jáne jalǵa berý máseleleri boıynsha ótinish tapsyrýǵa bolady.
Belgilengen merzimde ótinish bergen azamattarǵa 2027 jylǵy 1 qyrkúıekti qosa alǵanda kómek kórsetilýi múmkin. Bul merzim komıssııa qosymsha kómek kórsetý týraly usynym nemese sheshim qabyldaǵan nesıelerge de qatysty.
Taǵy qandaı merzimder belgilendi?
Baǵdarlamaǵa qatysatyn bankter men ózge de uıymdar 2027 jylǵy 15 shildege deıin kómek surap júgingen, biraq ótinishteri boıynsha tıisti rásimder áli aıaqtalmaǵan qaryz alýshylar men jalǵa alýshylardyń tizimin Qarjy naryǵyn retteý jáne damytý agenttigine usynýy tıis.
Al 2027 jylǵy 1 qarashaǵa deıin Qazaqstannyń ornyqtylyq qoryna ótemaqy somalaryn salystyryp tekserýdiń qorytyndy aktileri tapsyrylýy qajet.
Kimder ıpotekalyq nesıesin qaıta qarjylandyra alady?
Qaýlyda 2021 jylǵy 1 qańtar men 2024 jylǵy 31 jeltoqsan aralyǵynda berilgen keıbir ıpotekalyq nesıelerdi qaıta qarjylandyrý múmkindigi de qarastyrylǵan.
Bul maqsatqa buryn qaıta qarjylandyrylǵan nesıelerdi óteý nátıjesinde bosaǵan qarajat paıdalanylýy múmkin.
Alaıda bul múmkindik barlyq qaryz alýshyǵa birdeı berilmeıdi. Ol úshin azamat pen onyń nesıesi 2025 jylǵy 1 qańtardaǵy jaǵdaı boıynsha mynadaı talaptarǵa saı bolýy tıis:
• Qaryz alýshy baǵdarlamada kórsetilgen áleýmettik osal toptardyń birine jatýy nemese onda belgilengen aýrýlardyń birimen aýyrýy kerek; • Ipotekaǵa alynǵan baspana qaryz alýshy men onyń jubaıynyń Qazaqstandaǵy jalǵyz turǵyn úıi bolýy tıis; • Nesıe boıynsha tólem merzimin ótkizip alǵanyna 180 kúntizbelik kúnnen asýy qajet; • Negizgi qaryzdyń qaldyǵy 50 mln teńgeden aspaýy kerek; • Qaryz alýshynyń tabysy nesıeni qoldanystaǵy sharttar boıynsha óteýge jetkiliksiz bolýy tıis.
Osy talaptardyń barlyǵy oryndalǵan jaǵdaıda komıssııa ıpotekalyq nesıeni qaıta qarjylandyrýǵa usynym bere alady. Qaıta qarjylandyrý múmkindigin komıssııa qaraıdy.
Alaıda bul talaptar zańdy tulǵalarǵa berilgen nesıelerge, memlekettik ıpotekalyq baǵdarlamalar aıasynda rásimdelgen qaryzdarǵa jáne alaıaqtyq faktisi zańdy kúshine engen sot aktisimen rastalǵan nesıelerge qoldanylmaıdy.
Qaýly 2026 jylǵy 28 qyrkúıekte kúshine endi.
Buǵan deıin qarjylyq qıyndyqqa tap bolǵan azamattardyń nesıe sharttaryn qaıta qaraý úshin bankke júgine alatyny habarlanǵan edi.
