Qazaqstanda prezıdenttik kadrlyq rezerv qalyptasatyn bolady
NUR-SULTAN. QazAqparat - Qazaqstanda prezıdenttik kadrlyq rezerv qalyptasatyn bolady. Bul týraly BQO jurtshylyǵymen júzdesken QR Prezıdenti Qasym-Jomart Toqaev málim etti, dep habarlaıdy QazAqparat tilshisi.
Memleket basshysynyń aıtýynsha, onyń quramyna konkýrstyq negizde 300 jas maman iriktelip alynbaq.
Bul rette Batys Qazaqstan oblysy da keleshekte elimizdiń basqarý elıtasyna enetin laıyqty mamandaryn, jastar ókilderin usyna alady.
Prezıdent jastar kadr saıasaty 300 adammen shektelmeıtinin atap ótti.
«Bizder memlekettik qyzmettiń mańyzdy oryndaryna bilikti kadrlardy izdep, barlyq óńirde tańdaý, irikteý jumystaryn júrgizemiz. Elimizde jastardyń óz áleýetin iske asyrýǵa barlyq múmkindigi bar. Sonyń ishinde mınıstrlikter men ákimdikter, basqa da memlekettik organdar qyzmetkerleri kadr quramynyń turaqtylyǵy men sabaqtastyǵyn qamtamasyz etýi tıis. El erteńi jastar ekenin umytpaı, estafetany qabyldap alatyn laıyqty býyn tárbıeleýimiz kerek. Bul - ómir zańdylyǵy. Tutastaı alǵanda, bizder talantty jastardyń ekonomıkada, ǵylymda, ónerde, sport pen mádenıet salasynda ózderin tanyta alýy úshin barlyq jaǵdaıdy jasaımyz. Jastardyń bıznes bastamalaryna jol ashatyn "Jas kásipker" baǵdarlamasyn ázirleıtin bolamyz. Jastardyń bolashaǵy bar startaptaryna júıeli qoldaý kórsetiledi. Jumys tájirıbesi joq jas mamandardy qyzmetke alǵan jumys berýshilerdi yntalandyrý tetikteri jasalady. Osylaısha jumys jasamaıtyn nemese oqymaıtyn jastardyń máselesi sheshiledi», dedi Qasym-Jomart Toqaev.
