Qazaqstanda Prezıdent tapsyrmasy boıynsha keshendi áskerı reforma bastaldy
ASTANA. KAZINFORM - Qazaqstanda Prezıdent Qasym-Jomart Toqaevtyń tóraǵalyǵymen ótken Qaýipsizdik Keńesiniń otyrysynda maquldanǵan Áskerı reforma josparyn júzege asyrý bastaldy, dep habarlaıdy QR Qorǵanys mınıstrliginiń baspasóz qyzmeti.
Ózgerister Qarýly kúshterdiń qurylymyn, áskerı basqarý júıesin, áskerlerdiń daıarlyǵyn, áskerı qyzmet ótkerý tártibin jáne áskerı qyzmetshilerdiń quqyǵyn qorǵaý máselelerin qamtıdy.
Memleket basshysy zamanaýı, utqyr ári tehnologııalyq turǵydan damyǵan armııa qalyptastyrý mindetin qoıdy. Bul rette áskerı qyzmettiń qaýipsizdigine, komandırlik mádenıetke jáne memlekettik resýrstardy tıimdi paıdalanýǵa erekshe nazar aýdarylady.
Qarýly kúshterdiń qurylymy men quramy, qorǵanysty josparlaý, jumyldyrý daıyndyǵy jáne rezervti qalyptastyrý júıesi syndy armııanyń negizgi quramdas bólikterin jetildirý josparlanyp otyr.
Tehnologııalyq qaıta jaraqtandyrý otandyq qorǵanys ónerkásibin damytýmen, onyń ishinde ushqyshsyz quraldarǵa qarsy is-qımyl quraldaryn óndirýmen, sondaı-aq jasandy ıntellekt pen tsıfrlyq sheshimderdi engizýmen qatar júzege asyrylmaq.
Áskerlerdiń daıyndyq sapasyn arttyrý jáne áskerı oqý-jattyǵýlardy ótkizýge jumsalatyn shyǵyndardy azaıtý maqsatynda urys qımyldaryn modeldeýge múmkindik beretin sımýlıatsııalyq baǵdarlamalardy engizý kózdelip otyr. Endi áskerı qyzmetshilerdiń jańa taktıkany meńgerýin, zamanaýı qarý-jaraq úlgilerin qoldanýyn eskere otyryp, olardyń óz betinshe de, bólimsheler quramynda da senimdi áreket etý daǵdylaryn qalyptastyrýǵa erekshe nazar aýdarylady.
Negizgi ózgeristerdiń biri – merzimdi áskerı qyzmettiń eki kezeńdi modeline kóshý
Alǵashqy alty aıda bir shaqyrylymdaǵy sarbazdar oqý ortalyqtarynda bolyp, áskerı qyzmetke beıimdeledi, bastapqy áskerı bilim alady jáne dene daıyndyǵyn shyńdaıdy. Oqý úderisi aıasynda sarbazdar til úırenip, jasandy ıntellektini paıdalaný daǵdylaryn damyta alady. Sonymen qatar áskerı qyzmetshiler áskerı mamandyqtarmen qatar, eńbek naryǵynda suranysqa ıe azamattyq jumysshy kásipterin de meńgere alady.
Kelesi alty aıda áskerı qyzmetshiler áskerı bólimderde qyzmet atqaryp, jaýyngerlik daıarlyǵyn jetildirip, bólimshe quramynda qoıylǵan mindetterdi oryndaıdy. Jańa modeldiń jekelegen elementteri «Sarbaz+» jobasy aıasynda synaqtan ótkizildi. Eki kezeńdi merzimdi áskerı qyzmet modeliniń pılottyq jobasyn 2027 jyly iske qosý josparlanǵan.
Reforma aıasynda áskerı qyzmet ótkerý jaǵdaılaryn jaqsartýǵa jáne áskerı qyzmetshilerdi áleýmettik qorǵaýǵa erekshe kóńil bólinedi
Sondaı-aq áskerı bólimderdiń qolbasshylyǵyna táýelsiz áskerı keńesshiler ınstıtýtyn qurý kózdelip otyr. Olar áskerı qyzmetshilerge qoldaý kórsetip, quqyq buzýshylyqtardy anyqtaýǵa jáne olardyń zańdy múddelerin qorǵaýǵa kómektesedi.
Basym mindetterdiń biri – áskerı qyzmetshilerdi sapaly tamaqpen jáne áskerı kıim-keshekpen qamtamasyz etý. Sonymen qatar kazarmalar qoryn, oqý nysandary men áskerı polıgondardy jóndeý jáne qalpyna keltirý de josparlanýda.
Ózgerister jastardy daıarlaý júıesin de qamtıdy. 2027 jyldan bastap «Jas qyran», «Jas ulan» jáne «Jas sarbaz» kezeńderin biriktiretin «Jas aıbyn» biryńǵaı áskerı-patrıottyq daıarlaý júıesin qurý kózdelgen. Qaýipsiz minez-qulyq daǵdylaryn qalyptastyrý, alǵashqy kómek kórsetý men tótenshe jaǵdaılar kezinde áreket etýge úıretý mektepten basıalmaq.
Ákimdiktermen birlesip, jalpy bilim beretin oqý oryndarynda alǵashqy áskerı daıyndyqtyń sapaly júrgizilýin qamtamasyz etý, sondaı-aq mamandandyrylǵan áskerı mektepter jelisin damytý jumystary jalǵasady.
Jospardyń uıymdastyrýshylyq is-sharalaryn jyl sońyna deıin júzege asyrý kózdelgen, al negizgi tujyrymdamalyq ózgerister orta merzimdi perspektıvada iske asyrylady. Qorǵanys mınıstrligi áskerı reformanyń júzege asyrylý barysy týraly qoǵamdy turaqty túrde habardar etip otyrady.
