Qazaqstanda prank uıymdastyrýǵa resmı túrde tyıym salyna ma

ASTANA. KAZINFORM – QR Mádenıet jáne aqparat mınıstri Aıda Balaeva búginde ruqsatsyz túsirilimder men prankterge qatysty shaǵymdar kóbeıgenin aıtty.

- Prankter bar, sondaı-aq adamdardyń ruqsatynsyz júzege asyrylatyn keıbir túsirilimder bar. Sondyqtan bul normany barshamyz talqylaıtyn bolamyz. Jumys toby endi ǵana qurylyp jatyr. Eger qalasańyzdar, sizderdi jumys tobyna qosa alamyn. Bul turǵyda, kimdi túsirýge bolatynyn nemese túsirýge bolmaıtyny aıqyndalady, - dedi A. Balaeva Senatta tilshiler suraǵyna jaýap bere otyryp.

Onyń aıtýynsha, búginde qazaqstandyqtardan prankterge qatysty shaǵymdar da túsip jatyr.

Sonymen birge jýrnalıster «mundaı tyıym sheneýnikterdi qorǵaýdyń tásili emes pe?» dep surady.

- Sheneýnikter túsirilimderge úırenip alǵan. Qaıda barsaq ta, bizdi barlyq jerde vıdeoǵa túsiredi... Sondyqtan másele naqty sheneýnikter týraly emes, ıaǵnı jalpy osy baǵytty retke keltirýge qatysty. Osy oraıda talqylaý kerek. Bul rette, jumys tobyn quryp jatyrmyz. Atap aıtqanda, jýrnalısterden de, qarapaıym azamattardan kelip túsken ótinimder men suraqtardy talqylaımyz, - dedi mınıstr.

Eske salsaq, taıaýda Qytaı men Ózbekstannyń qoǵamdyq oryndarynda beıtanys jigitterdiń aıaq-qolynan ustap, prank túsirgen bloger qyzdyń áreketi halyq arasynda qyzý talqylandy. Tıisinshe, Arýjan Aıbekovaǵa qatysty ákimshilik jaza qabyldandy. Osy oraıda Kazinform tilshisi daýly vıdeo avtorymen suhbat quryp, blogerden mundaı qadamǵa ne úshin barǵanyn surap kórdi.

Budan buryn habarlanǵandaı, elimizde jyl basynan beri prank jasaǵany úshin 20-dan astam adam jaýapqa tartylǵan. Mundaı kontent túsirer aldynda neni bilý kerek? Jibek Joly telearnasynyń «Búgin LIVE» baǵdarlamasyna qonaq bolǵan zańger Abzal Bekbosynov osy suraqqa jaýap bergen edi.