Qazaqstanda poıyzda bıletsiz júretinder az bolmaı otyr
ASTANA. QazAqparat - Bıyl 2635 birlik jyljymaly temirjol quramyn paıdalanýǵa tyıym salyndy, dep habarlaıdy QazAqparat.
Kólik komıteti men onyń aýmaqtyq organdary Qazaqstan zańnamasynyń talaptaryna sáıkes, temirjol kóliginde qozǵalys qaýipsizdigin qamtamasyz etý boıynsha tıisti jumystar júrgizýde.
«2016 jyly 9 aıda temirjol kóliginde óz qyzmetin júzege asyratyn 159 kásiporynǵa tekserý júrgizildi. Tekseris barysynda temirjol kóligi qyzmetin retteıtin 2701 normatıvtik-quqyqtyq aktiler talabyn buzý deregi anyqtaldy. Onyń nátıjesinde anyqtalǵan buzýshylyqtardy joıý týraly 108 nusqaý berildi. Qozǵalys qaýipsizdigine qater tóndirgendikten 169 birlik temirjol jelisin, 2635 birlik jyljymaly temirjol quramyn paıdalanýǵa tyıym salyndy. Sondaı-aq, 160 jolaýshy poıyzy tekserilip, 417 jolaýshynyń jol júrý qujatynsyz (bıletsiz) júrgeni jáne 0,646 tonna rásimdelmegen júkti alyp júrýi anyqtaldy. 2016 jyldyń basynan 660 ákimshilik is rásimdelip, 27 724 566 teńge somasyna aıyppul salyndy»,-dep atap ótilgen QR IDM baspasóz qyzmetiniń málimetinde.
Budan bólek, 2016 jyly 9 aıda qozǵalys qaýipsizdigin buzýǵa qatysty 688 oqıǵa tirkeldi (2015 jyly 622), onyń ishinde: poıyzdardyń aýdarylýyna qatysty 5 jaǵdaı, 1 apatty jaǵdaı, jumystaǵy qıyndyqtar boıynsha 219 derek anyqtaldy.
