Qazaqstanda poıyzben júretin jolaýshylar sany 33 paıyzǵa artty

ASTANA. QazAqparat – Bıyl 8 aıda temirjol kóligi kásiporyndarynyń kirisi 851 mlrd teńgege jetti, dep habarlaıdy QazAqparat tilshisi.

«Bıylǵy qańtar-tamyzda temirjolmen tasymaldaıtyn kompanııalardyń kirisi 851 mlrd teńgege jetken. Bir jyl buryn bul kórsetkish 739,6 mlrd teńgeni quraǵan edi. Kiristiń basym bóligi, ıaǵnı 786,4 mlrd teńge dástúrli túrde júk tasymaly esebinen qamtamasyz etildi. Qalǵan 64,6 mlrd teńgesi jolaýshy tasymalyna tıesili», - delingen Energyprom.kz málimetinde.

Osy jyldyń 8 aıynda temirjol kóligimen 273 mln tonna júk tasymaldandy.

Júktiń kóp bóligi Aqtóbe, Aqmola oblystarynda jáne Astanada jetkizilgen. El boıynsha júk aınalymy 5,4 paıyzǵa ósken.

Atap aıtqanda, temirjol kóligimen 13,1 mln adam tasymaldanyp, bir jyl burynǵy kórsetkishke qaraǵanda 32,6 paıyzǵa artyq boldy. Óńirler boıynsha jolaýshylar kóbine elordada, Aqtóbe men Qyzylorda oblystarynda saparlaǵan.