Qazaqstanda poıyzdar men ushaqtarda ınternet qoljetimdi bolady
ASTANA. KAZINFORM – Bıyl eldegi respýblıkalyq mańyzy bar avtojoldar mobıldi ınternetpen, poıyzdar men ushaqtar spýtnıktik ınternetpen qamtamasyz etiledi. Sondaı-aq Qazaqstannyń kez kelgen jerinen uıaly telefon arqyly ınternetke qosylý múmkindigi bolady. Bul týraly Premer-Mınıstrdiń orynbasary — Jasandy ıntellekt jáne tsıfrlyq damý mınıstri Jaslan Mádıev jańa zań tanystyrylymynda aıtty.
Búgin Májiliste J.Mádıev «QR keıbir zańnamalyq aktilerine telekommýnıkatsııalar naryǵyn jáne derekterdi óńdeý ortalyqtaryn damytý máseleleri boıynsha ózgerister men tolyqtyrýlar engizý týraly» zań jobasyn birinshi oqylymda tanystyrdy.
– Sońǵy 3 jylda telekommýnıkatsııa salasyna quıylǵan ınvestıtsııa 1 trıllıon teńgeden asty. Bul qazirdiń ózinde naqty nətıje berip jatyr. Sońǵy 2 jylda tirkelgen baılanys abonentter sany 19%, uıaly baılanys – 12% ósti. Mobıldi ınternet jyldamdyǵy 75%, al ınternet-trafıktiń kólemi 67% artty. ıAǵnı, barlyq baǵytta ósim bar: trafık te, jyldamdyq ta, abonentter sany da turaqty ósip keledi. Bul ósim mobıldi operatorlardyń eń kóp qarjy salatyn bazalyq stantsııalar jelisin keńeıtýi esebinen múmkin boldy, – dedi Tsıfrlyq damý mınıstri.
Eskirgen 3G tehnologııasy júıeli túrde qysqartylyp keledi. Tek 3G-men ǵana qamtylǵan aýyldar sany 4G-ge jańǵyrtý esebinen 5 ese qysqaryp, 550 aýylǵa deıin azaıǵan.
– 5G bazalyq stantsııalarynyń belsendi qurylysy jalǵasyp jatyr. Byltyr sala tarıhyndaǵy eń iri jobalar iske qosyldy. Aldaǵy eki jylda 3,5 myńnan astam aýyldy joǵary jyldamdyqty ınternetke qosý josparlanyp otyr. Bul aýyldardy optıkalyq ınternetpen qamtýdy qazirgi 43%-dan 92%-ǵa jetkizýge múmkindik beredi, – dep tolyqtyrdy mınıstr.
Bıyl respýblıkalyq mańyzy bar avtojoldar, al kelesi jyly – negizgi oblystyq avtojoldar mobıldi ınternetpen qamtylady. Sondaı-aq, spýtnıktik ınternet arqyly el aýmaǵy tolyq qamtylady.
– Bıyl spýtnıktik ınternetti poıyzdar men ushaqtarǵa engizý josparlanǵan. Óńirde alǵash ret Direct-to-Cell tehnologııasy qoldanylyp jatyr. Ol azamattarǵa Qazaqstannyń kez kelgen jerinen uıaly telefon arqyly ınternetke qosylýǵa múmkindik beredi, – dedi Jaslan Mádıev.
Buǵan deıin J.Mádıev eldegi birqatar salaǵa jasandy ıntelekti qalaı engizilip jatqanyn aıtyp bergen edi.
