Qazaqstanda poıyzben bagaj tasymaly tsıfrlyq formatqa kóshedi
ASTANA. KAZINFORM — Stýdentter ázirlegen júıe bagaj tasymalyn jeńildetpek, dep habarlaıdy «Jolaýshylar tasymaly» AQ baspasóz qyzmeti.
«Jolaýshylar tasymaly» AQ 2026 jylǵy 22 mamyrdan bastap bagaj jáne júk-bagajdy rásimdeý men súıemeldeý protsesterin tsıfrlandyrýǵa arnalǵan pılottyq jobany synaqtan ótkizip jatyr. Joba №9/10 «Nurly jol – Almaty-2» poıyzy baǵytynda iske asyrylady. Synaq jumystary Nurly jol, Qaraǵandy jáne Almaty-2 stantsııalaryndaǵy bagaj bólimshelerin qamtıdy.
— Jańa tsıfrlyq júıe bagaj jáne júk-bagajǵa qatysty operatsııalardyń ashyqtyǵyn arttyrýǵa, esep júrgizýdi jeńildetýge jáne tasymaldy rásimdeý kezinde adamı faktordy barynsha azaıtýǵa baǵyttalǵan. Júıe jóneltimdi qabyldaýdan bastap, baǵyt boıymen súıemeldeýge deıingi barlyq protsesti biryńǵaı tsıfrlyq tártipke keltiredi, — delingen habarlamada.
Platforma stantsııa operatory arqyly jumys isteýge múmkindik beredi. Sonymen qatar WMS, ıaǵnı qoıma protsesterin basqarý júıesi negizinde ózine-ózi qyzmet kórsetý tásilderi de qarastyrylǵan.
Aıta keteıik, bul tsıfrlyq sheshimdi Astana IT University stýdentteri «Jolaýshylar tasymaly» AQ-men dýaldy oqytý baǵdarlamasy aıasyndaǵy yntymaqtastyq negizinde ázirledi. Joba barysynda stýdentter naqty óndiristik mindetterdi sheshýge qatysyp, alǵan bilimderin tájirıbede qoldanýǵa múmkindik aldy. Aldaǵy ýaqytta «Jolaýshylar tasymaly» AQ bul tsıfrlyq sheshimdi barlyq bagaj bólimshelerine kezeń-kezeńimen engizýdi josparlap otyr.
Qazaqstanda temirjol salasy jańǵyrtylyp, jańa vagondar satyp alynyp, ınfraqurylym jańartylyp jatqanyna qaramastan, jolaýshylar tasymalyndaǵy onyń úlesi áli de tómen kúıinde qalyp otyr. Kazinform tilshisi poıyzdardyń áýe jáne avtokólik tasymalynan nege qalyp qoıǵanyn jáne júrgizilip jatqan reformalardyń jaǵdaıdy ózgerte ala ma degen suraqtardy saralady.
