Qazaqstanda poshtamen sálemdeme jetkizý 3 kúnge deıin qysqarady

ASTANA. QazAqparat - Bıyl Qazaqstan boıynsha poshtamen sálemdeme jetkizý ýaqyty 3 kúnge deıin qysqarady. Bul týraly Astanada baspasóz máslıhatynda «Qazposhta» AQ basqarma tóraǵasy Sáken Sársenov málim etti, dep habarlaıdy QazAqparat tilshisi.

«Bıyl qańtarda jańa poshtalyq esep júıesin iske qosyp, bul óz kezeginde birneshe júıedegi málimetterdi biriktirdi. Osy oraıda sheteldik poshta kompanııalary júıesimen yqpaldasýǵa múmkindik jasalyp, endi árbir klıent óziniń sálemdemesin post.kz arqyly qadaǵalaı alady», - dedi S. Sársenov.

Onyń sózinshe, barlyq protsesterdi ońtaılyndyrý nátıjesinde, ótken jyly Qazaqstan boıynsha sálemdeme jetkizý ýaqyty 10-nan 6 kúnge deıin qysqardy. 2019 jyly sáýir aıynan bastap elimiz aýmaǵynda 6-dan 3 kúnge deıin azaıtý josparlanýda.

«Halyqaralyq tasymaldar merzimin byltyr 15 kúnge deıin azaıta aldyq. Eger de sheteldik seriktester ońtaıly qadamdar jasasa, onda bul merzimdi 10 kúnge deıin qysqartýǵa qaýqarly bolamyz», - dedi Sársenov.

Budan buryn habarlanǵandaı, «Qazposhta» basshysy sálemdemelerdiń joǵalýyna qatysty túsinik bergen edi.

«Ótken jyly 18,6 mln sálemdeme jetkizdik, onyń ishinde tek qana 469 sálemdeme jolda joǵaldy. ıAǵnı myń nemese mıllıon emes. Al eger ýaqytyly jetkizý máselesine toqtalsaq, álemdik statıstıka boıynsha sálemdemelerdiń 93-97 paıyzy der kezinde jetkizilýi tıis. Osy oraıda Dúnıjúzilik poshta odaǵynyń talaby bar. Bizdegi kórsetkish 95 paıyz shamasynda. 5 paıyzy túrli sebeptermen keshiktirilip jetkizildi», - dedi S. Sársenov.