Qazaqstanda polıgondaǵy qoqysty jaǵý arqyly energııa óndiriledi
NUR-SULTAN. QazAqparat – Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine qaldyqtardy energetıkalyq kádege jaratý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaıdy QazAqparat tilshisi.
Zań jobasynyń tujyrymdamasynda turmystyq qatty qaldyqtardy jaǵý arqyly olardy kádege jaratý kózdeledi. Bul, qaldyqtardyń qorshaǵan ortaǵa teris áserin azaıtýǵa jáne olardyń kómýge jatatyn kólemin qysqartýǵa múmkindik beredi.
«Zań jobasyna depýtattar qatty turmystyq qaldyqtardy órteý jolymen qaıta óńdep, keıinnen elektr energııasyn alý úshin quqyqtyq baza qurý maqsatynda bastamashylyq etti. Órteýge qaıta óńdeýge jatpaıtyn qaldyqtardyń bir bóligi ǵana qamtylady. Jyl saıyn elimizde shamamen 5 mln tonna qaldyq paıda bolady. Olardyń tek 15 paıyzy qaıta óńdeledi. Qazir osy mindetti iske asyrý úshin búkil álemde qoqys jaǵatyn keshender jumys isteıdi», - dedi Májilis depýtaty Quralaı Qaraken.
Onyń sózine qaraǵanda, elimizde elektr energııasyn óndirý arqyly qaldyqtardy termııalyq óńdeýden ótkizýge bolady. Mundaı tásil el aýmaǵyndaǵy polıgondardyń sany men alańyn qysqartýǵa ǵana emes, sondaı-aq qaldyqtardy jaǵýdan ekologııalyq ári ekonomıkalyq nátıje alýǵa múmkindik beredi.
Zań jobasynyń mańyzdy aspektisi elektr energııasyn alý úshin qaldyqtardy energetıkalyq kádege jaratý boıynsha segmentti qoldaýǵa baǵyttalǵan normalar bolyp otyr. Qujattyń tujyrymdamasyna sáıkes, negizgi qoldaý tetigi qoqys jaǵatyn kásiporyndar óndirgen elektr energııasyn kepildi satyp alý bolyp tabylady. Ol jańartylatyn energetıka salasyn qoldaýdyń qoldanystaǵy tetigine uqsas bolady.
Osyǵan baılanysty, zań jobasynda Ekologııalyq kodeks pen «Elektr energetıkasy týraly» jáne «Jańartylatyn energııa kózderin paıdalanýdy qoldaý týraly» Qazaqstan Respýblıkasynyń zańdaryna ózgerister men tolyqtyrýlar engizý kózdelgen.
