Qazaqstanda polıetılen paketteri óndirisi 63 paıyzǵa artty
NUR-SULTAN. QazAqparat - Qazaqstanda polıetılen paketter men sómkeler óndirisi 63 paıyzǵa artty, dep habarlaıdy QazAqparat tilshisi Energyprom.kz saıtyna silteme jasap.
Taratylǵan aqparatqa qaraǵanda, 2019 jyldyń qańtar-sáýirinde Qazaqstan kompanııalary 67,3 mlrd teńgeniń rezeńke jáne plastmassa buıymdaryn shyǵarǵan. Bul ótken jyldyń 4 aıyndaǵy kórsetkishten 16,4 paıyzǵa artyq. Atalǵan buıymdardyń óndirisi negizinen Almaty, Nur-Sultan qalalary men Almaty oblysynda shoǵyrlanǵan.
«Shynaıy mánde plastmassa taspalar, úldir óndirisi jyl ishinde 15 paıyzǵa, plastık esikter men terezeler óndirisi 9,4 paıyzǵa, plastmassadan jasalǵan turmystyq zattar óndirisi 11,6 paıyzǵa jáne polıetılen paketter men sómkeler óndirisi birden 63,3 paıyzǵa artqany baıqalady», - delingen taratylǵan aqparatta.
Plastmassa buıymdaryn shyǵaratyn kásiporyndar etılen polımerinen, propılen men vınılhlorıdten jasalatyn qubyrlar men shlangiler 9,6 paıyzǵa qymbattap, kelisi 665 teńgege deıin jetti. Polıetılen taspalar men úldir baǵasy da 7,4 paıyzǵa ósip, kelisine 695 teńge boldy. Plastık terezeler men tereze jaqtaýlary da 7,1 paıyzǵa qymbattap, kelisi 1081 teńgege jetip otyr.
Aıta keteıik, Energetıka mınıstrligi ázirlenip jatqan jańa QR ekologııalyq kodeks aıasynda Qazaqstan aýmaǵyndaǵy bólshek saýdada syıymdylyǵy kishkentaı polıetılen paketterdi paıdalanýǵa tyıym salýdy kózdep otyr.
«Bul bastamanyń qajettiligi mynada: negizinen polıetılen paketter qorshaǵan ortaǵa jáne adamdardyń densaýlyǵyna eleýli zııan keltiredi. Qazaqstandaǵy syıymdylyǵy shaǵyn polıetılen paketterdi satýǵa kezeń-kezeńimen tyıym salynady. Birinshi kezeńde polıetılen paketterdi tegin taratýǵa shekteý qoıylady. Osy kezeńde halyq arasynda ásirese qorshaǵan ortaǵa jáne adamdardyń densaýlyǵyna polıetılen paketterdiń qanshalyqty zııan ekenine baılanysty keńinen úgit júrgizý qajet. Sonymen birge, balamaly ekologııalyq qaptama óndirisin yntalandyrý máselesi de sheshilýi tıis. Ekinshi kezeńde olardyń el aýmaǵynda satylýyna tolyq tyıym salynady. Polıetılen paketterdi paıdalanýdaǵy bul shekteý máseleni jan-jaqty ári egjeı-tegjeıli zertteýden keıin engiziledi», dep túsindirgen edi mınıstrlikten.
