Qazaqstanda polıetılen paketterdi paıdalanýǵa tyıym salynady

NUR-SULTAN. QazAqparat -Energetıka mınıstrligi ázirlenip jatqan jańa QR ekologııalyq kodeks aıasynda Qazaqstan aýmaǵyndaǵy bólshek saýdada syıymdylyǵy kishkentaı polıetılen paketterdi paıdalanýǵa tyıym salýdy kózdep otyr, dep habarlaıdy QazAqparat tilshisi vedomstvonyń baspasóz qyzmetine silteme jasap.

«Bul bastamanyń qajettiligi mynada: negizinen polıetılen paketter qorshaǵan ortaǵa jáne adamdardyń densaýlyǵyna eleýli zııan keltiredi. Qazaqstandaǵy syıymdylyǵy shaǵyn polıetılen paketterdi satýǵa kezeń-kezeńimen tyıym salynady. Birinshi kezeńde polıetılen paketterdi tegin taratýǵa shekteý qoıylady. Osy kezeńde halyq arasynda ásirese qorshaǵan ortaǵa jáne adamdardyń densaýlyǵyna polıetılen paketterdiń qanshalyqty zııan ekenine baılanysty keńinen úgit júrgizý qajet. Sonymen birge, balamaly ekologııalyq qaptama óndirisin yntalandyrý máselesi de sheshilýi tıis. Ekinshi kezeńde olardyń el aýmaǵynda satylýyna tolyq tyıym salynady. Polıetılen paketterdi paıdalanýdaǵy bul shekteý máseleni jan-jaqty ári egjeı-tegjeıli zertteýden keıin engiziledi», - delingen habarlamada.

Plastıkalyq paketter men polıpropılenderdiń kóbi munaı men tabıǵı gazdan jasalǵan materıaldan daıyndalady. Al olardyń óndirisi kezinde aýaǵa taraıtyn zııandy hımııalyq zattar klımattyń jahandyq deńgeıde ózgerýine yqpal etetini eskerilýi kerek. Polıpropılen tolyǵymen joıylýy úshin 100 jyldan astam ýaqyt qajet. Plastıkalyq fragmentter polıhlorlanǵan bıfenılder men polıtsıkldi kómirsýtekter sııaqty zııandy zattar bóledi. Osylaısha, plastıkalyq paketter qorshaǵan ortany lastaıdy. Jeńil bolǵandyqtan, plastıkalyq paketter jel men sý arqyly tasymaldana beredi. Bul rette qalalar men jaǵalaý aımaqtary erekshe lastanyp jatqanyn aıta ketý kerek.

Mınıstrliktiń habarlaýynsha, 2018 jyldyń qorytyndysy boıynsha Qazaqstanda turmystyq qatty qaldyqtardy bólek jınaý, suryptaý jáne qaıta óńdeý jumystaryn júrgizetin kásiporyndar sany 150-ge deıin artqan. Al 2016 jyly ondaı kompanııalardyń sany bar-joǵy 115 edi. Qazaqstandaǵy 51 eldi mekende jeke jınaq júıesi, al 30 eldi mekende suryptaý júıesi engizilgen.

Bul baǵyttaǵy jumys jalǵasyp jatyr. Atap aıtqanda, 2019 jyldyń qańtarynda Mańǵystaý oblysynyń Munaıly aýdany Basqudyq aýylynda suryptaý qýaty jylyna 50 myń tonna bolatyn stansa iske qosylǵan. Sol sekildi, Óskemen qalasynda qatty turmystyq qaldyqtar polıgonyna qýaty jylyna 100 myń tonna bolatyn suryptaý jelisi ornatylǵan. Al 2019 jyly Atyraý qalasynyń polıgonynda qaldyqtardy suryptaý keshenin engizý josparlanyp otyr. Sol sııaqty Qyzylorda oblysynda memlekettik-jekemenshik seriktestik sheńberinde qatty qaldyqtardy jınaý, tasymaldaý, suryptaý, joıý, kádege jaratýdyń ortalyqtandyrylǵan basqarý júıesi qurylady.