Qazaqstanda polıtseılerdi oqytý formaty ózgerdi
NUR-SULTAN. QazAqparat - Polıtseılerdi daıyndaý júıesindegi ózgeristerdi halyq bilýi tıis. Bul týraly búgin QR Іshki ister mınıstri Erlan Turǵymbaev vedomstvoǵa qarasty joǵary oqý oryndarynyń basshylarmen ótken jıynda aıtty, dep habarlaıdy QazAqparat tilshisi.
Onyń atap ótýinshe, Elbasynyń tapsyrmasy boıynsha osy jyldyń basynan ishki ister organdarynda keń kólemdi reforma bastaldy. Bul reformanyń mańyzdy tustarynyń biri - vedomstvolyq bilim berý salasyn jańǵyrtý. Atalǵan salada qazirdiń ózinde naqty ister atqarylyp jatyr. Bilim berý júıesi ońtaılandyrylyp, 6 oqý ortalyǵy qysqartyldy. Qazirgi ýaqytta polıtseılerdi daıyndaý Almaty, Qaraǵandy jáne Qostanaı akademııalary, Aqtóbe zań ınstıtýty men Shymkent oqý ortalyǵynda júrgiziledi. Sonymen qatar ІІM bakalavrıat baǵdarlamasy boıynsha kadr daıyndaýdan bas tartty. Qaraǵandy akademııasynda ǵana bul baǵdarlama saqtalyp qaldy.
«Elimizde zańgerlik bilim beretin joǵary oqý oryndary jetkilikti. Biz jastardy osy oqý oryndarynan alyp, ary qaraı mamandandyrylǵan kýrstarda daıyndaımyz", - dedi mınıstr.
E.Turǵymbaevtyń sózine qaraǵanda, oqý protsesinde praktıkalyq sabaqtarǵa basymdyq beriledi. Krımnınalıster, tergeýshiler jáne jedel qyzmetkerler úshin 6 aılyq, qalǵandary úshin 3 aılyq oqý kýrstary qarastyrylǵan. Buryndary ofıtserlik quram úshin 3 aılyq, serjanttyq quram úshin 2 aılyq oqytý júıesi qoldanylǵan bolatyn.
«20 mamyrdan oqý jańa formatta júrgizile bastady. Zamanaýı ınteraktıvtik ádister men oqytý nysandary keńinen paıdalanylatyn bolady. Bul tyńdaýshylarǵa qysqa merzim ishinde kólemdi aqparatty ıgerýine múmkindik beredi», - dedi Erlan Turǵymbaev.
Kezdesý qorytyndysynda mınıstr bilim berý reformasynyń barlyq protsesteri jarııa túrde ótetinin aıtty. Osyǵan baılanysty oqý oryndarynyń basshylaryna jurtshylyqty jáne BAQ ókilderin shaqyra otyryp, «Ashyq esik kúnderin» nemese «dóńgelek ústelder» ótkizýdi jáne is-sharalar barysynda vedomstvolyq bilim berýdi jańǵyrtý máseleleriniń mán-maǵynasyn tolyq túsindirýdi tapsyrdy. 
"Halyq kadr daıarlaý júıesinde qandaı ózgerister boldy jáne ol polıtsııa jumysynyń sapasyna qalaı áser etetinin bilýi kerek. Biz azamattyq joǵary oqý oryndarynan kadrlardy iriktep alý arqyly vedomstvolyq oqý oryndarynyń áleýeti men bolashaq polıtseılerdi daıyndaý sapasyn kóterýdi maqsat etip otyrmyz", - dedi Іshki ister mınıstri.
